ദുബൈ : യുഎഇയിലെ ഇന്ത്യൻ പ്രവാസികൾ നേരിടുന്ന പാസ്പോർട്ട്, അറ്റസ്റ്റേഷൻ സേവനങ്ങളിലെ തടസ്സങ്ങൾക്ക് ശാശ്വത പരിഹാരം കാണണമെന്ന് ഇന്ത്യൻ കമ്മ്യൂണിറ്റി കൂട്ടായ്മകൾ ആവശ്യപ്പെട്ടു. ഇതിനൊപ്പം അടുത്തിടെ വരുത്തിയ പാസ്പോർട്ട് ഫീസ് വർദ്ധനവ് പിൻവലിക്കണമെന്ന ആവശ്യവും ഇവർ ശക്തമാക്കിയിട്ടുണ്ട്.
യുഎഇയിലെ പാസ്പോർട്ട്, അറ്റസ്റ്റേഷൻ സേവനങ്ങളുടെ ഭാവി സംബന്ധിച്ച ആശങ്കകളും അനിശ്ചിതത്വങ്ങളും നിലനിൽക്കുന്ന സാഹചര്യത്തിലാണ് പ്രവാസി സംഘടനകൾ ഒന്നിച്ച് ഈ ആവശ്യം മുന്നോട്ടുവെക്കുന്നത്. ഇന്ത്യയുടെ വിദേശകാര്യ മന്ത്രാലയം (MEA) അടുത്തിടെയാണ് പാസ്പോർട്ട് സേവനങ്ങൾക്കുള്ള നിരക്കുകൾ വർദ്ധിപ്പിച്ചത്. ഇത് സാധാരണക്കാരായ പ്രവാസികൾക്ക് വലിയ സാമ്പത്തിക ബാധ്യത വരുത്തിവെക്കുന്നുവെന്നും സേവനങ്ങൾ കൂടുതൽ എളുപ്പത്തിലും സുതാര്യമായും ലഭ്യമാക്കാൻ കേന്ദ്ര സർക്കാർ അടിയന്തരമായി ഇടപെടണമെന്നും പ്രവാസി സംഘടനകൾ ആവശ്യപ്പെടുന്നു.