ദുബായ് : ഗെയിമിംഗ് ലോകം ഏറ്റവും കൂടുതൽ കാത്തിരിക്കുന്ന ‘ഗ്രാൻഡ് തെഫ്റ്റ് ഓട്ടോ 6’ (GTA 6) ഗെയിമിന്റെ പ്രീ-ഓർഡറുകൾ യുഎഇയിൽ ഔദ്യോഗികമായി ആരംഭിച്ചു. റോക്ക്സ്റ്റാർ ഗെയിംസ് (Rockstar Games) പുറത്തുവിട്ട വിവരങ്ങൾ പ്രകാരം ജൂൺ 25 അർദ്ധരാത്രി മുതൽ ഗെയിം പ്രീ-ഓർഡർ ചെയ്യാനുള്ള സൗകര്യം ലഭ്യമാണ്. 2026 നവംബർ 19-നാണ് ഗെയിം ആഗോളതലത്തിൽ റിലീസ് ചെയ്യുന്നത്.
യുഎഇയിലെ ഗെയിമർമാർക്കായി രണ്ട് എഡിഷനുകളിലാണ് ഗെയിം ലഭ്യമാകുന്നത്. അടിസ്ഥാന പതിപ്പായ സ്റ്റാൻഡേർഡ് എഡിഷന് 80 ഡോളറാണ് (ഏകദേശം 294 ദിർഹം) വില. കൂടുതൽ ആന്തരിക ഫീച്ചറുകളും ആനുകൂല്യങ്ങളും അടങ്ങുന്ന അൾട്ടിമേറ്റ് എഡിഷന് 100 ഡോളറും (ഏകദേശം 367 ദിർഹം) വിലവരും. പ്ലേസ്റ്റേഷൻ, എക്സ്ബോസ് ഡിജിറ്റൽ സ്റ്റോറുകൾ വഴിയും വിർജിൻ മെഗാസ്റ്റോർ, ഗീക്കേ, ആമസോൺ യുഎഇ തുടങ്ങിയ പ്രമുഖ റീട്ടെയിലർമാർ വഴിയും ഗെയിം മുൻകൂട്ടി ബുക്ക് ചെയ്യാം. നവംബർ 12 മുതൽ ഗെയിം പ്രീ-ലോഡ് ചെയ്യാൻ സാധിക്കുമെങ്കിലും, പ്രീ-ഓർഡർ ചെയ്യുന്നവർക്ക് പ്രത്യേകമായി നേരത്തെ ഗെയിം കളിക്കാനുള്ള ‘ഏർലി ആക്സസ്’ ഉണ്ടായിരിക്കില്ലെന്ന് കമ്പനി വ്യക്തമാക്കിയിട്ടുണ്ട്.
