അബുദാബി : വളർത്തുമൃഗങ്ങളുടെ ഉടമകൾക്കായി അബുദാബിയിൽ പ്രത്യേക സംഗമമൊരുങ്ങുന്നു. അബുദാബി സിറ്റി മുനിസിപ്പാലിറ്റിയുടെ ആഭിമുഖ്യത്തിൽ സെപ്റ്റംബർ 25 വ്യാഴം മുതൽ 27 ശനി വരെ അൽ ശംഖ സ്ക്വയറിലാണ് (Al Shamkha Square) മൂന്ന് ദിവസത്തെ ‘പെറ്റ് ലവേഴ്സ് ഗാതറിങ്’ (Pet Lovers’ Gathering) സംഘടിപ്പിക്കുന്നത്. പരിപാടിയിലേക്ക് പ്രവേശനം പൂർണ്ണമായും സൗജന്യമാണ്. വളർത്തുമൃഗങ്ങളുമായി എത്തുന്നവർക്ക് മുൻകൂട്ടി രജിസ്റ്റർ ചെയ്യേണ്ട ആവശ്യമില്ല. എല്ലാ ദിവസവും വൈകുന്നേരം 5 മണി മുതൽ രാത്രി 9 മണി വരെയാണ് പരിപാടി നടക്കുന്നത്. ജോലി കഴിഞ്ഞോ വാരാന്ത്യ ഒഴിവ് സമയങ്ങളിലോ വളർത്തുമൃഗങ്ങളോടൊപ്പം സമയം ചെലവഴിക്കാൻ ആഗ്രഹിക്കുന്നവർക്ക് ഇതൊരു മികച്ച അവസരമായിരിക്കും.
