ഷാർജ : മനുഷ്യന്റെ അന്തസ്സും സുരക്ഷയും സംരക്ഷിക്കുന്നത് യുഎഇയുടെയും ഷാർജയുടെയും പ്രധാന നയമാണെന്ന് ഷാർജ ഭരണാധികാരി ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ പത്നിയും യുഎൻഎച്ച്സിആർ (UNHCR) അഭയാർത്ഥി കുട്ടികൾക്കായുള്ള പ്രത്യേക പ്രതിനിധിയുമായ ഷെയ്ഖാ ജവാഹർ ബിൻത് മുഹമ്മദ് അൽ ഖാസിമി. ലോക അഭയാർത്ഥി ദിനത്തോടനുബന്ധിച്ച് (World Refugee Day) സംസാരിക്കുകയായിരുന്നു അവർ.
യുദ്ധവും മറ്റ് പ്രതിസന്ധികളും കാരണം വീടും സുരക്ഷിതത്വവും നഷ്ടപ്പെട്ട് ലോകമെമ്പാടും പായുന്ന 11.5 കോടിയിലധികം വരുന്ന അഭയാർത്ഥികളുടെ പുനരധിവാസം ഒരു മാനുഷിക വെല്ലുവിളി മാത്രമല്ല, ലോകരാജ്യങ്ങളുടെ കൂട്ടായ ഉത്തരവാദിത്തമാണെന്ന് അവർ ഓർമ്മിപ്പിച്ചു. സുരക്ഷിതമായ വീട്, വിദ്യാഭ്യാസം, ജീവിക്കാനുള്ള സ്വാതന്ത്ര്യം എന്നിവയെല്ലാം വലിയ അനുഗ്രഹങ്ങളാണെന്നും അത് നഷ്ടപ്പെട്ടവർക്കാണ് അതിന്റെ വിലയറിയുകയെന്നും ഷെയ്ഖാ ജവാഹർ പറഞ്ഞു. അഭയാർത്ഥികളായ കുട്ടികൾക്കും യുവാക്കൾക്കും മികച്ച ഭാവിയും സുരക്ഷിതത്വവും ഉറപ്പാക്കാൻ അന്താരാഷ്ട്ര സമൂഹം ഒത്തൊരുമിച്ച് പ്രവർത്തിക്കണമെന്നും അവർ ആഹ്വാനം ചെയ്തു.
