അബുദാബി : വേനൽക്കാല സുരക്ഷാ ക്യാമ്പയിന്റെ ഭാഗമായി ബിസിനസ്സ് സ്ഥാപനങ്ങളിലും തൊഴിലിടങ്ങളിലും തീപിടുത്ത പ്രതിരോധ പ്രവർത്തനങ്ങളും മുൻകരുതലുകളും ശക്തമാക്കണമെന്ന് അബുദാബി സിവിൽ ഡിഫൻസ് അതോറിറ്റി ആവശ്യപ്പെട്ടു. സ്ഥാപനങ്ങളിലെ ഫയർ അലാറം, ഫയർ ഫൈറ്റിംഗ് സിസ്റ്റങ്ങൾ എന്നിവ കൃത്യമായി പ്രവർത്തിക്കുന്നുണ്ടെന്ന് ഉറപ്പാക്കാനും, അടിയന്തര സാഹചര്യങ്ങളെ നേരിടാൻ ജീവനക്കാരെ സജ്ജരാക്കാനും അതോറിറ്റി ഉടമകളോട് നിർദ്ദേശിച്ചു.
തീപിടുത്ത മുന്നറിയിപ്പ് സംവിധാനങ്ങൾ നിശ്ചിത മാനദണ്ഡങ്ങൾ പാലിച്ചുതന്നെ പതിവായി പരിശോധിക്കുകയും പരിപാലിക്കുകയും വേണം. എമർജൻസി എക്സിറ്റുകൾ വ്യക്തമായി അടയാളപ്പെടുത്താനും, രക്ഷാമാർഗ്ഗങ്ങളിലെ തടസ്സങ്ങളും സാധന സാമഗ്രികളും നീക്കം ചെയ്യാനും നിർദ്ദേശമുണ്ട്. അപകടസാധ്യതകൾ കുറയ്ക്കുന്നതിനായി ജീവനക്കാർക്ക് പതിവായി മോക്ക് ഡ്രില്ലുകളും ഒഴിപ്പിക്കൽ പരിശീലനങ്ങളും നൽകണം. വേനൽക്കാലത്ത് ജീവനും സ്വത്തിനും ബിസിനസ്സ് തുടർച്ചയ്ക്കും സംരക്ഷണം നൽകാൻ സുരക്ഷാ മാനദണ്ഡങ്ങൾ പാലിക്കേണ്ടത് അത്യാവശ്യമാണെന്ന് അതോറിറ്റി വ്യക്തമാക്കി.
