അബുദാബി : കാർഷിക അവശിഷ്ടങ്ങളായി തള്ളിക്കളഞ്ഞിരുന്ന ഈന്തപ്പന മടലുകൾ ഉപയോഗിച്ച് നിർമ്മാണ മേഖലയ്ക്ക് ആവശ്യമായ ഉയർന്ന ശേഷിയുള്ള ബോർഡുകൾ നിർമ്മിച്ച് യുഎഇ കമ്പനിയായ ‘ഡെസേർട്ട് ബോർഡ്’ (Desert Board). ഒരു മരം പോലും മുറിക്കാതെ പൂർണ്ണമായും സ്വാഭാവിക അവശിഷ്ടങ്ങൾ പുനരുപയോഗിച്ച് നിർമ്മിക്കുന്ന ‘പാം സ്ട്രാൻഡ് ബോർഡ്’ (Palm Strand Board – PSB) നിർമ്മാണ രംഗത്ത് വലിയ വിപ്ലവത്തിനാണ് വഴിവെച്ചിരിക്കുന്നത്. യുഎഇയിലുള്ള നാല് കോടിയോളം ഈന്തപ്പനകളിൽ നിന്ന് പ്രതിവർഷം വെട്ടിമാറ്റുന്ന ടൺ കണക്കിന് മടലുകളാണ് ഇതിനായി ഉപയോഗിക്കുന്നത്.
മുമ്പ് പരമ്പരാഗതമായി കത്തിച്ചുകളയുകയോ മണ്ണിൽ കുഴിച്ചുമൂടുകയോ ചെയ്തിരുന്ന ഈ അവശിഷ്ടങ്ങൾ ചെറുതാക്കി അറുത്ത്, കഴുകി, ഉയർന്ന മർദ്ദത്തിൽ അമർത്തിയാണ് തീപിടിത്തത്തെയും ചിതലുകളെയും പ്രതിരോധിക്കുന്ന കട്ടിയുള്ള ബോർഡുകളാക്കി മാറ്റുന്നത്. വനനശീകരണത്തിനെതിരെയുള്ള ആഗോള പോരാട്ടത്തിൽ വലിയൊരു ചുവടുവെപ്പാണ് ഈ പ്രാദേശിക ഉൽപ്പന്നമെന്ന് ഡെസേർട്ട് ബോർഡ് ഏരിയ മാനേജർ അബ്ദുൾ ഖാദർ ത്രാബൗൾസി വ്യക്തമാക്കി. സർക്കുലർ ഇക്കോണമി അഥവാ പുനരുപയോഗ സാമ്പത്തിക വ്യവസ്ഥ അടിസ്ഥാനമാക്കി പ്രവർത്തിക്കുന്ന ഈ തദ്ദേശീയ പ്ലാന്റ് യുഎഇയുടെ സുസ്ഥിര വികസന ലക്ഷ്യങ്ങൾക്ക് വലിയ പിന്തുണയാണ് നൽകുന്നത്.
