അബുദാബി : എഴുപതിലധികം രാജ്യങ്ങളിൽ നിന്നുള്ള പൗരന്മാർക്ക് മുൻകൂട്ടി വിസയെടുക്കാതെ പ്രവേശനം അനുവദിക്കുന്ന പുതുക്കിയ വിസ വിവരങ്ങൾ യുഎഇ പുറത്തുവിട്ടു. ജിസിസി പൗരന്മാർക്ക് വിസയില്ലാതെ ഐഡി കാർഡ് ഉപയോഗിച്ച് യാത്ര ചെയ്യാവുന്നതാണ്. ഇതുകൂടാതെ യൂറോപ്യൻ രാജ്യങ്ങൾ ഉൾപ്പെടെയുള്ള 49 രാജ്യങ്ങൾക്ക് 90 ദിവസത്തെയും, അമേരിക്കയും ബ്രിട്ടനും ഉൾപ്പെടെയുള്ള രാജ്യങ്ങൾക്ക് 30 ദിവസത്തെയും സൗജന്യ വിസ ഓൺ അറൈവൽ സൗകര്യം രാജ്യം നൽകുന്നുണ്ട്. പ്രമുഖ വിദേശ രാജ്യങ്ങളിലെ സാധുവായ വിസയോ റസിഡൻസ് പെർമിറ്റോ ഉള്ള നിർദ്ദിഷ്ട ഏഴ് രാജ്യങ്ങളിലെ പൗരന്മാർക്ക് ഇപ്പോൾ 14 അല്ലെങ്കിൽ 60 ദിവസത്തെ പ്രത്യേക വിസ ഓൺ അറൈവൽ ആനുകൂല്യവും ലഭ്യമാകും.
