പ്രാദേശിക സുരക്ഷയും നയതന്ത്രവും എടുത്തുപറഞ്ഞ് യുഎഇ; ഇറാൻ വിദേശകാര്യമന്ത്രിയുമായി ചർച്ച

അബുദാബി : മേഖലയിലെ സുരക്ഷയും സ്ഥിരതയും ഉറപ്പാക്കാൻ നയതന്ത്ര ചർച്ചകൾക്കും പരമാധികാരത്തെ ബഹുമാനിക്കുന്നതിനുമാണ് യുഎഇ മുൻഗണന നൽകുന്നതെന്ന് യുഎഇ പ്രസിഡന്റിന്റെ നയതന്ത്ര ഉപദേശകൻ ഡോ. അൻവർ ഗർഗാഷ് വ്യക്തമാക്കി. യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാൻ ഇറാൻ വിദേശകാര്യ മന്ത്രി അബ്ബാസ് അരാഗ്ചിയുമായി നടത്തിയ ടെലിഫോൺ ചർച്ചയ്ക്ക് പിന്നാലെയാണ് പ്രതികരണം. യുഎസും ഇറാനും തമ്മിൽ ധാരണാപത്രം ഒപ്പുവെച്ചതിന് ശേഷമുള്ള പ്രാദേശിക സാഹചര്യങ്ങൾ ഇരുനേതാക്കളും വിലയിരുത്തി.
മേഖലയിലെ സംഘർഷങ്ങൾ ഉടനടി അവസാനിപ്പിക്കുക, രാജ്യങ്ങളുടെ പരമാധികാരത്തെയും അയൽപക്ക ബന്ധങ്ങളെയും ബഹുമാനിക്കുക, അന്താരാഷ്ട്ര നിയമങ്ങൾ കർശനമായി പാലിക്കുക എന്നിവ യുഎഇയുടെ ഉറച്ച നിലപാടുകളാണെന്ന് ഷെയ്ഖ് അബ്ദുള്ള ചർച്ചയിൽ വ്യക്തമാക്കി. ഹോർമുസ് കടലിടുക്ക് വഴിയുള്ള തടസ്സമില്ലാത്ത കപ്പൽ ഗതാഗതവും സമുദ്ര സുരക്ഷയും ഉറപ്പാക്കേണ്ടതിന്റെ ആവശ്യകത അദ്ദേഹം ഊന്നിപ്പറഞ്ഞു. പ്രാദേശിക പ്രതിസന്ധികൾ പരിഹരിക്കാൻ കൃത്യമായ തത്വങ്ങളിൽ അധിഷ്ഠിതമായ ഉത്തരവാദിത്തമുള്ള നയതന്ത്ര ചർച്ചകളാണ് ഉചിതമെന്ന് ഡോ. അൻവർ ഗർഗാഷും വ്യക്തമാക്കി.