ബന്ധുവിവാഹങ്ങളും ജനിതക രോഗങ്ങളും; ജാഗ്രത വേണമെന്ന് യുഎഇ ഡോക്ടർമാർ

ദുബായ് : ഗൾഫ് മേഖലയിലെ ജനസംഖ്യയിൽ ജനിതകപരമായ പ്രത്യേകതകൾ കൂടുതലാണെന്നും, അടുത്ത ബന്ധുക്കൾ തമ്മിലുള്ള വിവാഹങ്ങൾ (Consanguineous marriage) കാരണം പാരമ്പര്യ രോഗങ്ങൾ വർദ്ധിച്ചുവരുന്നതായും ഡോക്ടർമാരുടെ മുന്നറിയിപ്പ്. ‘ജെനറ്റിക് റിസ്ക് ഇൻ ദ ഗൾഫ്: വാട്ട് അവർ ഡിഎൻഎ ഈസ് ടെല്ലിംഗ് അസ് എബൗട്ട് ഇൻഹെറിറ്റഡ് ഡിസീഡ്’ എന്ന വിഷയത്തിൽ നടന്ന ചർച്ചയിലാണ് ഡോക്ടർമാർ ഇക്കാര്യം വ്യക്തമാക്കിയത്.

എസ്.കെ.എം.സി/സെഹയിലെ കൺസൾട്ടന്റ് ഫിസിഷ്യൻ മെഡിക്കൽ ജെനിറ്റിക്സ്റ്റും യു.എ.ഇ.യു കോളേജ് ഓഫ് മെഡിസിനിലെ അസിസ്റ്റന്റ് പ്രൊഫസറുമായ ഡോ. മർയം അൽ ഷെഹി ചർച്ചയിൽ മുഖ്യപ്രഭാഷണം നടത്തി. അടുത്ത ബന്ധുക്കൾ തമ്മിലുള്ള വിവാഹങ്ങൾ മേഖലയിൽ കൂടുതലാണെന്നും ഇത് റീസെസീവ് ജനിതക വൈകല്യങ്ങളുടെ വ്യാപനം വർദ്ധിപ്പിക്കുന്നുണ്ടെന്നും അവർ പറഞ്ഞു.

ദുബായ് ഹെൽത്തിന്റെ ജെനിറ്റിക് മെഡിസിൻ സെന്റർ ഡയറക്ടർ ഡോ. അഹ്മദ് അബൗ തയൂണിന്റെ നേതൃത്വത്തിൽ നേച്ചർ മെഡിസിനിൽ പ്രസിദ്ധീകരിച്ച പഠനം അവർ ഉദ്ധരിച്ചു. ദുബായിലെ നിർബന്ധിത വിവാഹപൂർവ്വ സ്ക്രീനിംഗിന് വിധേയരായ ആദ്യ 1,000 ദമ്പതികളിൽ 8 ശതമാനവും ഒരേ രോഗകാരണമായ ജനിതക വകഭേദമുള്ളവരാണെന്ന് ഈ പഠനം കണ്ടെത്തിയിട്ടുണ്ട്. ഒമാനിൽ കുട്ടികളിലുണ്ടായ ഉപാപചയ രോഗങ്ങളിൽ 80 ശതമാനവും രക്തബന്ധമുള്ള മാതാപിതാക്കളുടെ കുട്ടികളിലാണെന്ന് മറ്റൊരു പഠനം വ്യക്തമാക്കുന്നതായും അവർ കൂട്ടിച്ചേർത്തു.

ഈ ആരോഗ്യപ്രശ്നങ്ങൾ മുൻകൂട്ടി പ്രതിരോധിക്കുന്നതിന്റെ ഭാഗമായി യുഎഇയിൽ 2025 ജനുവരി മുതൽ വിവാഹപൂർവ്വ ജനിതക പരിശോധന നിർബന്ധമാക്കിയിട്ടുണ്ട്. അബുദാബിയിൽ 570-ലധികം ജീനുകളും ദുബായിൽ 782 ജീനുകളും പരിശോധിക്കുന്ന സംവിധാനമാണുളളത്. ലോകത്തിലെ തന്നെ ഏറ്റവും സമഗ്രമായ വിവാഹപൂർവ്വ ജനിതക സ്ക്രീനിംഗ് പ്രോഗ്രാമാണ് യുഎഇ നൽകുന്നതെന്ന് ഡോ. മർയം അൽ ഷെഹി വ്യക്തമാക്കി. ഇതിനുപുറമെ, നവജാത ശിശുക്കളിലെ പരിശോധനയും പ്രതിരോധത്തിന്റെ രണ്ടാം ഘട്ടമായി നടപ്പിലാക്കുന്നുണ്ട്.