ദുബായിൽ വിനോദസഞ്ചാരികളുടെ എണ്ണത്തിൽ വൻ വർദ്ധനവ്; ഓഗസ്റ്റിൽ 8.69 ലക്ഷം സന്ദർശകർ

ദുബായ് : ദുബായിൽ അന്താരാഷ്ട്ര വിനോദസഞ്ചാരികളുടെ എണ്ണത്തിൽ വൻ കുതിച്ചുചാട്ടം. ഓഗസ്റ്റ് മാസത്തിൽ മാത്രം 8,69,000 അന്താരാഷ്ട്ര സന്ദർശകരാണ് ദുബായിലെത്തിയത്. 2026 ഫെബ്രുവരിക്ക് ശേഷമുള്ള ഏറ്റവും ഉയർന്ന പ്രതിമാസ കണക്കാണിത്. ദുബായ് ഇക്കണോമി ആൻഡ് ടൂറിസം ഡിപ്പാർട്ട്‌മെന്റ് (DET) പുറത്തുവിട്ട വിവരങ്ങൾ അനുസരിച്ച് മാർച്ച് മാസം മുതൽ സന്ദർശകരുടെ എണ്ണത്തിൽ ഇരട്ടക്കക്ക പ്രതിമാസ വളർച്ചയാണ് രേഖപ്പെടുത്തുന്നത്. ഇതോടെ 2026-ലെ ആദ്യ എട്ട് മാസങ്ങളിൽ ദുബായിലെത്തിയ ആകെ അന്താരാഷ്ട്ര സഞ്ചാരികളുടെ എണ്ണം 6.97 മില്യണായി (69.7 ലക്ഷം) ഉയർന്നു.
അറേബ്യൻ ട്രാവൽ മാർക്കറ്റ് (ATM 2026) ആരംഭിക്കുന്ന പശ്ചാത്തലത്തിൽ ദുബായിലെ ഹോട്ടൽ മേഖലയിലും മികച്ച വീണ്ടെടുപ്പാണ് ഉണ്ടാകുന്നത്. ഓഗസ്റ്റിലെ ഹോട്ടൽ ഒക്യുപൻസി 66 ശതമാനത്തിലെത്തി. മാർച്ച് മാസത്തിൽ 36 ശതമാനമായിരുന്ന ഒക്യുപൻസി നിരക്കിൽ നിന്നാണ് ഈ വലിയ മുന്നേറ്റം. ജനുവരി മുതൽ ഓഗസ്റ്റ് വരെയുള്ള കാലയളവിൽ ദുബായിലെ ഹോട്ടലുകളിൽ 2.16 കോടിയിലധികം റൂം നൈറ്റുകൾ ബുക്ക് ചെയ്യപ്പെട്ടു. ഓഗസ്റ്റ് അവസാനത്തോടെ ദുബായിലെ ആകെ ഹോട്ടൽ മുറികളുടെ എണ്ണം 1.49 ലക്ഷത്തോട് അടുത്തിരിക്കുകയാണ്.