യുഎഇയിൽ 6,933 ലെക്സസ് വാഹനങ്ങൾ തിരിച്ചുവിളിക്കുന്നു

ദുബായ് : സാങ്കേതിക തകരാറുകൾ പരിഹരിക്കുന്നതിനായി യുഎഇയിൽ 6,933 ലെക്സസ് വാഹനങ്ങൾ തിരിച്ചുവിളിക്കുന്നതായി അൽ ഫുത്തൈം മോട്ടോഴ്‌സ് അറിയിച്ചു. സമ്പദ്‌വ്യവസ്ഥ, ടൂറിസം മന്ത്രാലയത്തിന്റെ സഹകരണത്തോടെയാണ് രണ്ട് ഘട്ടങ്ങളിലായി തിരിച്ചുവിളിക്കൽ പ്രചാരണം സംഘടിപ്പിച്ചിരിക്കുന്നത്. 2021-നും 2024-നും ഇടയിൽ ജപ്പാനിൽ നിർമ്മിച്ച LX500, LX600 മോഡലുകളാണ് ഈ പദ്ധതിയിൽ ഉൾപ്പെടുന്നത്.
എഞ്ചിൻ ഇലക്ട്രോണിക് കൺട്രോൾ യൂണിറ്റ് (ECU) സോഫ്റ്റ്‌വെയർ അപ്‌ഡേറ്റ് ചെയ്യുകയാണ് ആദ്യ ദൗത്യത്തിന്റെ ലക്ഷ്യം. ആക്സിലറേഷൻ സമയത്ത് എഞ്ചിൻ പെർഫോമൻസിലുണ്ടാകുന്ന തകരാർ പരിഹരിക്കാൻ ഉദ്ദേശിച്ചുള്ള ഈ സൗജന്യ സോഫ്റ്റ്‌വെയർ അപ്‌ഡേറ്റ് 3,222 വാഹനങ്ങളെ ബാധിക്കും. കൂടാതെ, 10-സ്പീഡ് ഓട്ടോമാറ്റിക് ട്രാൻസ്മിഷനിലെ സാങ്കേതിക തകരാറുകൾ പരിഹരിക്കാൻ 3,711 വാഹനങ്ങളുടെ ട്രാൻസ്മിഷൻ കൺട്രോൾ യൂണിറ്റ് സൌജന്യമായി പരിശോധിക്കുകയും റീപ്രോഗ്രാം ചെയ്യുകയും ചെയ്യും. വാഹന ഉടമകളെ നേരിട്ട് ബന്ധപ്പെട്ട് ആവശ്യമായ തിരുത്തൽ നടപടികൾ സ്വീകരിക്കുമെന്ന് അധികൃതർ വ്യക്തമാക്കി.