ദുബായ് : ദുബായ് മെട്രോയുടെ പുതിയ ബ്ലൂ ലൈനിലെ ഏറ്റവും വലിയ അണ്ടർഗ്രൗണ്ട് സ്റ്റേഷനുകളിലൊന്നായ ഡ്രാഗൺ മാർട്ട് സ്റ്റേഷൻ നിർമ്മാണത്തിൽ സുപ്രധാന നാഴികക്കല്ല്. നിലത്തിന് 20 മീറ്ററിലധികം അടിയിലായി നിർമ്മിക്കുന്ന സ്റ്റേഷനിലേക്ക് ടണൽ ബോറിംഗ് മെഷീൻ (TBM) 1.2 കിലോമീറ്റർ തുരങ്കപാത പൂർത്തിയാക്കി എത്തിച്ചേർന്നു. റൂട്ട് പെർമിറ്റ് സർവേകൾക്കും മാധ്യമ സന്ദർശനത്തിനുമിടെയാണ് പദ്ധതിയുടെ നിർമ്മാണ പുരോഗതിയും സ്റ്റേഷന്റെ ആദ്യ രൂപവും ആർടിഎ പുറത്തുവിട്ടത്.
ഏകദേശം 39,480 ചതുരശ്ര മീറ്റർ വിസ്തീർണ്ണമുള്ള ഡ്രാഗൺ മാർട്ട് സ്റ്റേഷനിൽ കോൺക്രീറ്റ് ഭിത്തികളും തൂണുകളും ഇതിനകം സ്ഥാപിച്ച് കഴിഞ്ഞു. 580-ഓളം തൊഴിലാളികളാണ് ഈ സ്റ്റേഷനിൽ മാത്രം രാത്രിയും പകലുമായി ജോലി ചെയ്യുന്നത്. 24 മണിക്കൂറും പ്രവർത്തിക്കുന്ന കൂറ്റൻ ടണൽ ബോറിംഗ് മെഷീൻ ദിവസം 13 മുതൽ 17 മീറ്റർ വരെ തുരന്നാണ് മുന്നേറുന്നത്. ഡ്രാഗൺ മാർട്ട് സ്റ്റേഷനു പുറമെ ഇന്റർനാഷണൽ സിറ്റി 1, ഇന്റർനാഷണൽ സിറ്റി 2 എന്നീ സമീപ സ്റ്റേഷനുകളുടെ നിർമ്മാണവും അതിവേഗത്തിൽ പുരോഗമിക്കുകയാണെന്ന് അധികൃതർ വ്യക്തമാക്കി. ഡ്രാഗൺ മാർട്ടിൽ നിന്നും ഇനി അൽ വർഖ (Al Warqa) ഭാഗത്തേക്കാണ് അടുത്തഘട്ട തുരങ്ക നിർമ്മാണം നടക്കുക.