മക്കൾ സുരക്ഷിതരായിരിക്കട്ടെ; മാതാപിതാക്കൾക്ക് ജാഗ്രതാ നിർദ്ദേശവുമായി ഫുജൈറ പോലീസ്

ഫുജൈറ : വേനലവധിക്കാലത്ത് കുടുംബങ്ങൾ കൂട്ടത്തോടെ ബീച്ചുകളിലേക്കും സ്വിമ്മിംഗ് പൂളുകളിലേക്കും എത്തുന്ന സാഹചര്യത്തിൽ, കുട്ടികളുടെ സുരക്ഷയുടെ കാര്യത്തിൽ മാതാപിതാക്കൾ അതീവ ജാഗ്രത പാലിക്കണമെന്ന് ഫുജൈറ പോലീസ്. കുട്ടികളെ ഒരു കാരണവശാലും വെള്ളത്തിനരികിൽ ഒറ്റയ്ക്ക് വിടരുതെന്നും നിരന്തരമായ നിരീക്ഷണം മാത്രമാണ് അപകടങ്ങൾ ഒഴിവാക്കാനുള്ള ഏക പോംവഴിയെന്നും പോലീസ് ഓർമ്മിപ്പിച്ചു. മസാഫി കോംപ്രിഹെൻസീവ് പോലീസ് സ്റ്റേഷനും മീഡിയ ആൻഡ് പബ്ലിക് റിലേഷൻസ് ഡിപ്പാർട്ട്മെന്റും സംയുക്തമായാണ് ഈ സുരക്ഷാ കാമ്പയിൻ ആരംഭിച്ചത്. ലൈഫ് ഗാർഡുമാരെയോ മുതിർന്ന കുട്ടികളെയോ മാത്രം വിശ്വസിച്ച് ചെറിയ കുട്ടികളെ വെള്ളത്തിലിറക്കരുത്. നീന്തുമ്പോൾ ലൈഫ് ജാക്കറ്റ് പോലുള്ള സുരക്ഷാ സംവിധാനങ്ങൾ ഉപയോഗിക്കണമെന്നും നിർദ്ദേശമുണ്ട്. ഒരു നിമിഷത്തെ ശ്രദ്ധക്കുറവ് വലിയ ദുരന്തത്തിന് കാരണമായേക്കാമെന്നും കുട്ടികളുടെ സുരക്ഷയ്ക്ക് മുൻഗണന നൽകി വേനലവധി സുരക്ഷിതമാക്കണമെന്നും പോലീസ് കൂട്ടിച്ചേർത്തു.