58
ഷാർജ : ജൂലൈ, ഓഗസ്റ്റ് മാസങ്ങളിലെ വേനലവധിക്കാലത്തെ തിരക്ക് പ്രമാണിച്ച് ഏകദേശം 30 ലക്ഷത്തോളം യാത്രക്കാരെ വരവേൽക്കാൻ ഷാർജ അന്താരാഷ്ട്ര വിമാനത്താവളം വിപുലമായ ക്രമീകരണങ്ങൾ ഒരുക്കി. ഈ സീസണിൽ യാത്രക്കാരുടെ സുഗമമായ യാത്ര ഉറപ്പാക്കുന്നതിനായി 19,000-ത്തോളം വിമാന സർവീസുകളാണ് വിമാനത്താവളത്തിൽ ഷെഡ്യൂൾ ചെയ്തിരിക്കുന്നത്.
തിരക്ക് ഒഴിവാക്കാനായി യാത്രക്കാർ വിമാനം പുറപ്പെടുന്നതിന് കുറഞ്ഞത് 3 മണിക്കൂർ മുമ്പെങ്കിലും എയർപോർട്ടിൽ എത്തണമെന്ന് അധികൃതർ നിർദ്ദേശിച്ചു. വീട്ടിലിരുന്ന് തന്നെ യാത്രാനടപടികൾ പൂർത്തിയാക്കാൻ സഹായിക്കുന്ന ‘ഹോം ചെക്ക്-ഇൻ’ സൗകര്യം, എയർപോർട്ടിലെ സെൽഫ് സർവീസ് ചെക്ക്-ഇൻ കൗണ്ടറുകൾ, വിഐപി പരിഗണനയോടെ യാത്രാനടപടികൾ വേഗത്തിലാക്കുന്ന ‘അൽ ദിയാഫ’ ഹോസ്പിറ്റാലിറ്റി സർവീസ് എന്നിവ യാത്രക്കാർക്ക് പ്രയോജനപ്പെടുത്താമെന്ന് ഷാർജ എയർപോർട്ട് അതോറിറ്റി അറിയിച്ചു.