ഫുജൈറ : ഫുജൈറ ഗവൺമെന്റുമായി 10 വർഷത്തെ തന്ത്രപ്രധാനമായ ഇന്ധന വിതരണ കരാറിൽ ഒപ്പുവെച്ച് ദുബായ് സാമ്പത്തിക വിപണിയിൽ (DFM) ലിസ്റ്റ് ചെയ്തിട്ടുള്ള പ്രമുഖ കമ്പനിയായ എതിഹാദ് എനർജി ഹോൾഡിംഗ് (Etihad Energy Holding). ഫുജൈറയിൽ പുതുതായി നിർമ്മിക്കാൻ ലക്ഷ്യമിടുന്ന എതിഹാദ് റിഫൈനറിയിൽ നിന്ന് ഉത്പാദിപ്പിക്കുന്ന പെട്രോളും മറ്റ് അനുബന്ധ പെട്രോളിയം ഉത്പന്നങ്ങളും ദീർഘകാലത്തേക്ക് വാങ്ങുന്നതിനുള്ള കരാറാണിത്. 2026 ജൂലൈ 6 മുതൽ പ്രാബല്യത്തിൽ വന്ന ഈ കരാർ വഴി മേഖലയിലെ ഇന്ധന ആവശ്യങ്ങൾ നിറവേറ്റാനും ഊർജ്ജ ഹബ്ബ് എന്ന നിലയിൽ ഫുജൈറയുടെ സ്ഥാനം കൂടുതൽ ശക്തമാക്കാനും സാധിക്കും.
ഏകദേശം 300 ദശലക്ഷം മുതൽ 350 ദശലക്ഷം യുഎസ് ഡോളർ വരെ ചെലവ് പ്രതീക്ഷിക്കുന്ന ഈ പുതിയ റിഫൈനറി പ്രൊജക്റ്റിന്റെ എഞ്ചിനീയറിംഗ്, ഡിസൈൻ പഠനങ്ങൾ ഇതിനകം തന്നെ ആരംഭിച്ചുകഴിഞ്ഞു. കുറഞ്ഞ മലിനീകരണമുള്ള യൂറോ 5 (Euro 5) നിലവാരത്തിലുള്ള പെട്രോളാണ് ഇവിടെ ഉത്പാദിപ്പിക്കുക. ഇതിലൂടെ തങ്ങളുടെ ഓഹരി ഉടമകൾക്കും കമ്പനിക്കും 1 ബില്യൺ ഡോളറിലധികം (100 കോടി ഡോളർ) ദീർഘകാല മൂല്യം സൃഷ്ടിക്കാൻ സാധിക്കുമെന്ന് എതിഹാദ് എനർജി ചീഫ് എക്സിക്യൂട്ടീവ് ഓഫീസർ സെയ്ഫ് അൽ ഹസൈമ വ്യക്തമാക്കി. (മുമ്പ് ഗൾഫ് നാവിഗേഷൻ ഹോൾഡിംഗ് എന്നറിയപ്പെട്ടിരുന്ന കമ്പനി, അടുത്തിടെയാണ് എതിഹാദ് എനർജി എന്ന് പുനർനാമകരണം ചെയ്തത്).