ദുബായ് : സ്കൂൾ വേനലവധിക്കാലം ആരംഭിച്ചതോടെ യുഎഇയിൽ നിന്ന് തനിച്ച് യാത്ര ചെയ്യുന്ന കുട്ടികൾക്കായി വിപുലമായ സൗകര്യങ്ങളൊരുക്കി എമിറേറ്റ്സ് എയർലൈൻസ്. അടുത്ത രണ്ട് ആഴ്ചകൾക്കുള്ളിൽ മുതിർന്നവരുടെ തുണയില്ലാതെ യാത്ര ചെയ്യുന്ന 3,500-ലധികം കുട്ടികളെയാണ് എമിറേറ്റ്സ് വരവേൽക്കുന്നത്. കഴിഞ്ഞ അഞ്ച് വർഷത്തിനിടെ 2.5 ലക്ഷത്തിലധികം കുട്ടികളാണ് എമിറേറ്റ്സിന്റെ ‘അൺഅക്കമ്പനിഡ് മൈനർ’ (Unaccompanied Minors) സേവനം പ്രയോജനപ്പെടുത്തിയത്. യുണൈറ്റഡ് കിങ്ഡം, റഷ്യ, കെനിയ, ഫ്രാൻസ്, ഇന്ത്യ, ഈജിപ്ത് എന്നീ രാജ്യങ്ങളിലേക്കാണ് ഇത്തരത്തിൽ കൂടുതൽ കുട്ടികളും യാത്ര ചെയ്യുന്നത്.
5 മുതൽ 12 വയസ്സ് വരെയുള്ള കുട്ടികൾ തനിച്ച് യാത്ര ചെയ്യുമ്പോൾ ഈ സേവനം നിർബന്ധമാണ്. കുട്ടികളെ ദുബായ് എയർപോർട്ടിൽ എത്തിക്കുന്നത് മുതൽ ലക്ഷ്യസ്ഥാനത്ത് രക്ഷിതാക്കളുടെ കൈകളിൽ സുരക്ഷിതമായി ഏൽപ്പിക്കുന്നത് വരെ എമിറേറ്റ്സിന്റെ പ്രത്യേക പരിശീലനം ലഭിച്ച ഉദ്യോഗസ്ഥരുടെ മേൽനോട്ടമുണ്ടാകും. ദുബായ് വിമാനത്താവളത്തിൽ പുതുതായി നവീകരിച്ച പ്രത്യേക ലോഞ്ചിൽ കുട്ടികൾക്കായി പ്ലേസ്റ്റേഷൻ 5 പ്രോ ഗെയിമുകൾ, വൈഫൈ, ലഘുഭക്ഷണങ്ങൾ എന്നിവയും ഒരുക്കിയിട്ടുണ്ട്. യാത്രാവേളയിൽ വിമാനത്തിനുള്ളിൽ കുട്ടികൾക്ക് കളിക്കോപ്പുകളും പോളറോയിഡ് ക്യാമറയിൽ പകർത്തിയ യാത്രാ ചിത്രങ്ങളും എമിറേറ്റ്സ് സമ്മാനമായി നൽകും.