റഷ്യ-ഉക്രെയ്ൻ തടവുകാരുടെ മോചനം: വീണ്ടും വിജയകരമായി യുഎഇ മധ്യസ്ഥത

അബുദാബി : റഷ്യയും ഉക്രെയ്നും തമ്മിലുള്ള തടവുകാരുടെ മോചനത്തിനായി യുഎഇ നടത്തിയ പുതിയ മധ്യസ്ഥശ്രമങ്ങൾക്ക് വൻ വിജയം. യുഎഇയുടെ ഇടപെടലിനെത്തുടർന്ന് ഇരുപക്ഷത്തുനിന്നും 160 പേർ വീതം ആകെ 320 തടവുകാരാണ് മോചിതരായത്. ഇതോടെ ഇരുരാജ്യങ്ങളും തമ്മിൽ യുഎഇ മധ്യസ്ഥതയിൽ ഇതുവരെ മോചിപ്പിക്കപ്പെട്ട ആകെ തടവുകാരുടെ എണ്ണം 7,791 ആയി ഉയർന്നു.

യുഎഇ നടത്തിയ ഇരുപത്തിയഞ്ചാമത് (25) വിജയകരമായ മധ്യസ്ഥതയാണിത്. യുഎഇയുടെ മധ്യസ്ഥശ്രമങ്ങളോട് പൂർണ്ണമായി സഹകരിച്ചതിന് ഇരുരാജ്യങ്ങൾക്കും യുഎഇ വിദേശകാര്യ മന്ത്രാലയം (MoFA) നന്ദി അറിയിച്ചു. റഷ്യയും ഉക്രെയ്നുമായി യുഎഇ പുലർത്തുന്ന ശക്തമായ നയതന്ത്രബന്ധത്തിന്റെ തെളിവാണ് ഈ വിജയമെന്നും പ്രതിസന്ധികൾക്ക് സമാധാനപരമായ പരിഹാരം കാണുന്നതിനും മാനുഷിക പ്രത്യാഘാതങ്ങൾ ലഘൂകരിക്കുന്നതിനുമുള്ള ശ്രമങ്ങൾ രാജ്യം തുടരുമെന്നും മന്ത്രാലയം വ്യക്തമാക്കി.