ആഗോള മികച്ച സമ്പ്രദായങ്ങളുടെ പട്ടികയിൽ തിളങ്ങി ദേവ

ദുബായ് : ആഗോളതലത്തിൽ ഏറ്റവും മികച്ച സംഘടനാ പ്രവർത്തനങ്ങൾക്കുള്ള അന്താരാഷ്ട്ര മത്സരമായ ‘ഇന്റർനാഷണൽ ബെസ്റ്റ് പ്രാക്ടീസ് കോമ്പറ്റീഷനിൽ’ (IBPC) വൻ നേട്ടം സ്വന്തമാക്കി ദുബായ് ഇലക്ട്രിസിറ്റി ആൻഡ് വാട്ടർ അതോറിറ്റി (DEWA). ദേവ സമർപ്പിച്ച 11 വ്യത്യസ്ത പ്രവർത്തനങ്ങൾ അഞ്ച് മുതൽ ഏഴ് വരെ സ്റ്റാർ റേറ്റിംഗുകളോടെ ആഗോളതലത്തിലെ ഏറ്റവും മികച്ച സമ്പ്രദായങ്ങളായി തിരഞ്ഞെടുക്കപ്പെട്ടു. ഈ ആഗോള നേട്ടത്തിന് വഴിയൊരുക്കിയ ദേവ എംഡിയും സിഇഒയുമായ സയീദ് മുഹമ്മദ് അൽ തായറെ, ഐബിപിസി ചെയർമാൻ ഡോ. റോബിൻ മാൻ ആദരിച്ചു.
നൂതനത്വം, സുസ്ഥിരത, മികച്ച സേവനം എന്നിവ മുൻനിർത്തി ദേവ വികസിപ്പിച്ചെടുത്ത 5 പദ്ധതികൾക്ക് പരമാവധി റേറ്റിംഗായ 7-സ്റ്റാർ ലഭിച്ചു. ഗ്യാസ് ടർബൈൻ ഇന്റലിജന്റ് കൺട്രോളർ, സോളാർ പാനലുകളുടെ പ്രവർത്തനക്ഷമത ഉറപ്പാക്കുന്ന ‘ഹബ്-രീഹ്’ വെബ് സർവീസ്, ഒരു മണിക്കൂറിനുള്ളിൽ ജലചോർച്ചയും തകരാറുകളും കണ്ടെത്തുന്ന എഐ അധിഷ്ഠിത ‘ഹൈഡ്രോ ഇൻസൈറ്റ്’ സിസ്റ്റം, സ്വകാര്യ മേഖലയുമായുള്ള സഹകരണ മാതൃക (IWPP), ഗ്യാസ് ടർബൈൻ അറ്റകുറ്റപ്പണി സമയം റെക്കോർഡ് വേഗത്തിൽ കുറച്ച സംവിധാനം എന്നിവയ്ക്കാണ് 7-സ്റ്റാർ റേറ്റിംഗ് ലഭിച്ചത്. കൂടാതെ 3 പദ്ധതികൾക്ക് 6-സ്റ്റാർ റേറ്റിംഗും മറ്റ് 3 എണ്ണത്തിന് 5-സ്റ്റാർ റേറ്റിംഗും ലഭിച്ചു. ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ ദീർഘവീക്ഷണത്തിന് അടിവരയിടുന്നതാണ് ഈ നേട്ടമെന്ന് സയീദ് അൽ തായർ പറഞ്ഞു.