ജീൻ എഡിറ്റിംഗിൽ യുഎസ് കമ്പനിയുമായി കൈകോർത്ത് അബുദാബി

അബുദാബി : അപൂർവ്വവും പാരമ്പര്യവുമായ രോഗങ്ങൾക്കുള്ള ജീൻ എഡിറ്റിംഗ് (Gene-Editing) ചികിത്സാരീതികൾ വികസിപ്പിക്കുന്നതിനായി യുഎസ് കമ്പനിയായ മാമത്ത് ബയോസയൻസസുമായി (Mammoth Biosciences) കരാറിലേർപ്പെട്ട് അബുദാബി. അബുദാബി ആരോഗ്യ വകുപ്പും (DoH) പ്രമുഖ ഹെൽത്ത് കെയർ ശൃംഖലയായ ‘M42’ ഉം ചേർന്നാണ് സാൻ ഡിയാഗോയിൽ വെച്ച് ഈ ധാരണാപത്രത്തിൽ ഒപ്പുവെച്ചത്.
പ്രസിദ്ധമായ ‘ഇമാറാത്തി ജീനോം പ്രോഗ്രാമിലൂടെ’ ലഭ്യമായ വിവരങ്ങൾ പ്രയോജനപ്പെടുത്തിയാണ് ‘ക്രിസ്പർ’ (CRISPR) സാങ്കേതികവിദ്യ അടിസ്ഥാനമാക്കിയുള്ള പുതിയ ചികിത്സാരീതികൾ വികസിപ്പിക്കുക. നോബൽ സമ്മാന ജേതാവായ ജെന്നിഫർ ഡൗഡ്ന സഹസ്ഥാപകയായ മാമത്ത് ബയോസയൻസസ്, രോഗലക്ഷണങ്ങൾ ചികിത്സിക്കുന്നതിന് പകരം രോഗത്തിന് കാരണമാകുന്ന ജനിതക വ്യതിയാനങ്ങളെ തിരുത്തുന്ന രീതിയാണ് അവലംബിക്കുന്നത്. ഇതിന്റെ ഭാഗമായി കമ്പനിയുടെ പ്രധാന ക്ലിനിക്കൽ പരീക്ഷണമായ ‘MB-111’ അബുദാബിയിൽ അവതരിപ്പിക്കുകയും അത്യാധുനിക നിർമ്മാണ കേന്ദ്രങ്ങൾ സ്ഥാപിക്കുകയും ചെയ്യും.