ഷാര്‍ജ : സ്‌കൂളുകളിലും ഡിജിറ്റൽ ഇടങ്ങളിലും കുട്ടികളുടെ സുരക്ഷ ഉറപ്പാക്കാൻ രക്ഷിതാക്കളെ സജ്ജരാക്കുന്ന പുതിയ ‘അഹ്ല്‍ അല്‍ അഥര്‍’ പദ്ധതിയുമായി ഷാര്‍ജ ചൈല്‍ഡ് സേഫ്റ്റി ഓര്‍ഗനൈസേഷന്‍. ‘ബോധവത്കരണമാണ് സ്വാധീനം സൃഷ്ടിക്കുന്നത്’ എന്ന മുദ്രാവാക്യവുമായി ആരംഭിച്ച ഈ പരിപാടിയിലൂടെ രക്ഷിതാക്കളെ ബോധവത്കരണ അംബാസഡർമാരായി വളർത്തിയെടുക്കുകയാണ് ലക്ഷ്യം. ആദ്യഘട്ടത്തിൽ തെരഞ്ഞെടുക്കപ്പെടുന്ന പേരെന്റ്സ് കൗൺസിൽ അംഗങ്ങൾക്ക് നാല് മാസത്തെ പ്രത്യേക പരിശീലനം നൽകും.
സൈബർ സുരക്ഷ, ഡിജിറ്റൽ വെല്ലുവിളികൾ, കുടുംബ ആശയവിനിമയം, മാനസിക പിന്തുണ തുടങ്ങിയ മേഖലകളിലാണ് പരിശീലനം. യുഎഇയിൽ സോഷ്യൽ മീഡിയ ഉപയോഗത്തിനുള്ള പ്രായപരിധി 15 വയസ്സായി നിശ്ചയിച്ച സാഹചര്യത്തിൽ, കുട്ടികളുടെ ഓൺലൈൻ ഇടപഴകലുകൾ സുരക്ഷിതമാക്കാൻ രക്ഷിതാക്കളെ പ്രാപ്തരാക്കുകയാണ് ഈ സംരംഭം. യുഎഇ സൈബർ സെക്യൂരിറ്റി കൗൺസിൽ ഉൾപ്പെടെയുള്ള വിവിധ സർക്കാർ വകുപ്പുകളുടെ സഹകരണത്തോടെയാണ് പദ്ധതി നടപ്പാക്കുന്നത്.
19