ദുബായ് : രാജ്യത്ത് താപനില ഉയർന്ന തോതിൽ തുടരുമ്പോഴും ഫുജൈറ ഉൾപ്പെടെയുള്ള യുഎഇയുടെ കിഴക്കൻ മേഖലകളിൽ മഴയ്ക്ക് സാധ്യതയുള്ളതായി ദേശീയ കാലാവസ്ഥാ കേന്ദ്രം (NCM). ഉച്ചയ്ക്ക് ശേഷം രാജ്യത്തിന്റെ ഉൾപ്രദേശങ്ങളിലേക്കും മഴ വ്യാപിച്ചേക്കാം. അബുദാബിയിലും ഷാർജയിലും 44 ഡിഗ്രിയും ദുബായിൽ 45 ഡിഗ്രിയുമായിരിക്കും ഇന്നത്തെ കൂടിയ താപനില. അൽ ഐൻ, ലിവ എന്നിവിടങ്ങളിൽ ചൂട് 46 ഡിഗ്രി സെൽഷ്യസ് വരെ ഉയർന്നേക്കാം. മഴ കാരണം ഫുജൈറയിലാണ് ഇന്ന് ഏറ്റവും കുറഞ്ഞ താപനില (38 ഡിഗ്രി സെൽഷ്യസ്) രേഖപ്പെടുത്തുക.
തീരദേശങ്ങളിൽ ശക്തമായ കാറ്റിനും അന്തരീക്ഷത്തിൽ പൊടിപടലങ്ങൾ ഉയരാനും സാധ്യതയുള്ളതിനാൽ റോഡുകളിൽ കാഴ്ചപരിധി കുറഞ്ഞേക്കാം. തുറസ്സായ സ്ഥലങ്ങളിലൂടെ യാത്ര ചെയ്യുന്ന ഡ്രൈവർമാർ ജാഗ്രത പാലിക്കണമെന്ന് കാലാവസ്ഥാ കേന്ദ്രം നിർദ്ദേശിച്ചു. ഒമാൻ കടലിനെ അപേക്ഷിച്ച് അറേബ്യൻ ഗൾഫ് ഇന്ന് പൊതുവെ ശാന്തമായിരിക്കുമെന്നും അധികൃതർ വ്യക്തമാക്കി.
21