അബുദാബി : യുഎഇയിൽ വരും ദിവസങ്ങളിൽ പൊതുവെ ശാന്തമായ കാലാവസ്ഥയായിരിക്കുമെന്നും, പ്രത്യേകിച്ച് വടക്കൻ മേഖലകളിൽ താപനിലയിൽ നേരിയ കുറവുണ്ടാകുമെന്നും ദേശീയ കാലാവസ്ഥാ നിരീക്ഷണ കേന്ദ്രം (NCM) അറിയിച്ചു. അതേസമയം മണിക്കൂറിൽ 40 കിലോമീറ്റർ വേഗതയിൽ വീശിയടിക്കുന്ന ശക്തമായ കാറ്റ് മൂലം രാജ്യത്തിന്റെ ചില ഭാഗങ്ങളിൽ പൊടിക്കാറ്റ് (Blowing dust) ദൃശ്യമാകാൻ സാധ്യതയുണ്ട്.
ആഭ്യന്തര മേഖലകളിൽ പരമാവധി താപനില 42 മുതൽ 47 ഡിഗ്രി സെൽഷ്യസ് വരെയും, തീരപ്രദേശങ്ങളിൽ 36 മുതൽ 42 ഡിഗ്രി സെൽഷ്യസ് വരെയും, മലയോര മേഖലകളിൽ 32 മുതൽ 38 ഡിഗ്രി സെൽഷ്യസ് വരെയുമായിരിക്കും രേഖപ്പെടുത്തുക. വെള്ളിയാഴ്ച വരെ കാലാവസ്ഥ പൊതുവെ അനുകൂലമായി തുടരുമെങ്കിലും കിഴക്കൻ പ്രദേശങ്ങളിൽ ബുധനാഴ്ച ഭാഗികമായി മേഘാവൃതമായിരിക്കും. ശനിയാഴ്ചയോടെ വടക്കൻ പ്രദേശങ്ങളിലും ദ്വീപുകളിലും താഴ്ന്ന മേഘങ്ങൾ പ്രത്യക്ഷപ്പെടാനും, ശനി രാത്രി മുതൽ ഞായർ രാവിലെ വരെ തീരപ്രദേശങ്ങളിൽ ഈർപ്പം (Humidity) വർദ്ധിക്കാനും സാധ്യതയുണ്ട്. അറേബ്യൻ ഗൾഫ് തീരങ്ങളിൽ കടൽ ചില സമയങ്ങളിൽ പ്രക്ഷുബ്ധമാകുമെങ്കിലും ഒമാൻ കടൽ ശാന്തമായിരിക്കുമെന്നും അധികൃതർ വ്യക്തമാക്കി.