അബുദാബി: ഉഭയകക്ഷി ബന്ധം ശക്തമാക്കുന്നതിന്റെയും ഇരുരാജ്യങ്ങളും തമ്മിലുള്ള യാത്രകൾ കൂടുതൽ സുഗമമാക്കുന്നതിന്റെയും ഭാഗമായി യുഎഇയും ആഫ്രിക്കൻ രാജ്യമായ ഈസ്വതിനിയും (Eswatini) പരസ്പരം വിസ ഒഴിവാക്കുന്നതിനുള്ള ധാരണാപത്രത്തിൽ ഒപ്പുവെച്ചു. യുഎഇയെ പ്രതിനിധീകരിച്ച് വിദേശകാര്യ സഹമന്ത്രി ഷെയ്ഖ് ശഖ്ബൂത് ബിൻ നഹ്യാൻ അൽ നഹ്യാനും, ഈസ്വതിനിയെ പ്രതിനിധീകരിച്ച് ആഭ്യന്തര മന്ത്രി ലിൻഡിവേ രാജകുമാരിയുമാണ് കരാറിൽ ഒപ്പുവെച്ചത്. ഇരുരാജ്യങ്ങളിലെയും പൗരന്മാർക്ക് വിസയില്ലാതെ യാത്ര ചെയ്യാൻ അനുമതി നൽകുന്ന ഈ കരാർ, പരസ്പര സഹകരണം ആഴത്തിലാക്കാനും വിവിധ മേഖലകളിൽ ഒന്നിച്ച് പ്രവർത്തിക്കാനുമുള്ള ഇരുപക്ഷത്തിന്റെയും താല്പര്യത്തെയാണ് പ്രതിഫലിപ്പിക്കുന്നത്. പുതിയ വിസ ഇളവ് സംവിധാനം ഇരുരാജ്യങ്ങളിലെയും ജനങ്ങൾ തമ്മിലുള്ള സമ്പർക്കം വർദ്ധിപ്പിക്കുന്നതിനൊപ്പം ബിസിനസ്, നിക്ഷേപം, ഔദ്യോഗിക കൈമാറ്റങ്ങൾ എന്നിവയ്ക്കും വലിയ രീതിയിൽ സഹായകരമാകും.
ഇരുരാഷ്ട്രങ്ങളും തമ്മിലുള്ള നയതന്ത്ര-സാമ്പത്തിക ബന്ധങ്ങൾ ശക്തിപ്പെടുത്തുന്നതിനും പൊതുവായ താല്പര്യമുള്ള മേഖലകളിൽ സഹകരണത്തിന്റെ പുതിയ വഴികൾ തുറക്കുന്നതിനുമായി നടന്നു വരുന്ന ശ്രമങ്ങളുടെ ഭാഗമായാണ് ഈ നടപടി. ഈ ധാരണാപത്രം ഇരുരാജ്യങ്ങളും തമ്മിലുള്ള ശക്തമായ സൗഹൃദത്തിന്റെ തെളിവാണെന്നും വരും വർഷങ്ങളിൽ പരസ്പര താല്പര്യങ്ങൾ മുൻനിർത്തി ബന്ധം കൂടുതൽ ദൃഢമാക്കുമെന്നും അധികൃതർ വ്യക്തമാക്കി.