പള്ളിയിൽ പെരുന്നാൾ നിസ്കാരത്തിനെത്തി റോബോട്ട്; വീഡിയോ വൈറൽ

ദുബായ്: പരമ്പരാഗത എമിറാത്തി വസ്ത്രമായ കന്ദൂരയും തലപ്പാവുമണിഞ്ഞ് ദുബായിലെ പള്ളിയിൽ പെരുന്നാൾ നിസ്കാരത്തിൽ പങ്കാളിയാകാൻ ഹ്യൂമനോയിഡ് റോബോട്ട് എത്തിയ ദൃശ്യങ്ങൾ സമൂഹമാധ്യമങ്ങളിൽ തരംഗമാകുന്നു. ‘ബു സുനൈദ’ എന്ന പ്രാദേശിക പേരിൽ അറിയപ്പെടുന്ന യുണിട്രീ ജി1 (Unitree G1) വിഭാഗത്തിൽപ്പെട്ട റോബോട്ടാണ് കൗതുകകരമായ ഈ ദൃശ്യങ്ങളിലൂടെ വീണ്ടും ഇന്റർനെറ്റിൽ വൈറലായത്. ഒരു എസ്‌യുവി വാഹനത്തിൽ നിന്നിറങ്ങി വിശ്വാസികൾക്കൊപ്പം പള്ളിക്കുള്ളിലേക്ക് നടന്നുപോകുന്ന റോബോട്ട്, മറ്റ് എമിറാത്തി-പ്രവാസി വിശ്വാസികൾക്കൊപ്പം നിസ്കാരത്തിന്റെ ചലനങ്ങൾ അനുകരിക്കുന്നതുമാണ് വീഡിയോയിലുള്ളത്. കുട്ടികൾക്കായുള്ള ഒരു വിദ്യാഭ്യാസപരമായ ഉള്ളടക്കം എന്ന രീതിയിലാണ് ഈ ദൃശ്യങ്ങൾ യഥാർത്ഥത്തിൽ നിർമ്മിച്ചിരിക്കുന്നത്. ‘ട്രാവൽ ബസ് യുഎഇ’ ഉൾപ്പെടെയുള്ള പ്രമുഖ പേജുകൾ ഈ വീഡിയോ പങ്കുവെച്ചതോടെ വലിയ രീതിയിലുള്ള ചർച്ചകൾക്കാണ് ഇത് വഴിവെച്ചിരിക്കുന്നത്. റോബോട്ടിന്റെ സാന്നിധ്യത്തെ ഒരു പുത്തൻ സാങ്കേതിക മുന്നേറ്റമായി കണ്ട് പലരും ഇതിനെ സ്വാഗതം ചെയ്തപ്പോൾ, വിശുദ്ധമായ ആരാധനാലയങ്ങളിൽ ഇത്തരം യന്ത്രമനുഷ്യരെ പ്രവേശിപ്പിക്കുന്നത് ഉചിതമാണോ എന്ന് ചോദ്യം ചെയ്ത് മറ്റ് ചിലരും രംഗത്തെത്തിയിട്ടുണ്ട്. എന്തായാലും ഇത്തവണത്തെ പെരുന്നാൾ സീസണിലെ ഏറ്റവും സവിശേഷമായ കാഴ്ചയായി മാറിയിരിക്കുകയാണ് ഈ റോബോട്ട് നിസ്കാരം.