ഹോട്ടൽ അപ്പാർട്ട്‌മെന്റിന് പകരം നൽകിയത് റെസിഡൻഷ്യൽ ഫ്ലാറ്റ്

ദുബായ് : ഹോട്ടൽ അപ്പാർട്ട്‌മെന്റ് എന്ന് വിശ്വസിപ്പിച്ച് തനിക്ക് റെസിഡൻഷ്യൽ ഫ്ലാറ്റ് നൽകി പറ്റിച്ചുവെന്ന ദുബായിലെ പ്രവാസി നിക്ഷേപകന്റെ പരാതിയിൽ പുതിയ വാദം കേൾക്കാൻ ദുബായ് അപ്പീൽ കോടതിയോട് കാസേഷൻ കോടതി ഉത്തരവിട്ടു. 46 ലക്ഷത്തിലധികം ദിർഹത്തിന്റെ (Dh4.6 million) വിപണി മൂല്യമുള്ള പ്രോപ്പർട്ടി തർക്കത്തിലാണ് ദുബായ് കാസേഷൻ കോടതിയുടെ ഈ നിർണായക ഇടപെടൽ. ദുബായ് ലാൻഡിലെ ആഡംബര പ്രോപ്പർട്ടി 2013 ഒക്ടോബറിലാണ് നിക്ഷേപകൻ വാങ്ങാൻ കരാറിലേർപ്പെടുന്നത്. ഹോട്ടൽ അപ്പാർട്ട്‌മെന്റിനായി 31.3 ലക്ഷം ദിർഹം വിലയും പിന്നീട് സർവീസ്-മെയിന്റനൻസ് ഇനത്തിലുമായി ആകെ 46.9 ലക്ഷം ദിർഹം ഇയാൾ ഡെവലപ്പർക്ക് നൽകിയിരുന്നു. എന്നാൽ നിർമ്മാണം വൈകി കൈമാറിയപ്പോഴാണ് കരാറിലുള്ള ഹോട്ടൽ അപ്പാർട്ട്‌മെന്റിന് പകരം ഇത് സാധാരണ റെസിഡൻഷ്യൽ ഫ്ലാറ്റാണെന്ന് നിക്ഷേപകൻ തിരിച്ചറിയുന്നത്. ഇത് നിക്ഷേപത്തിന്റെ മൂല്യത്തെ ബാധിച്ചതായും നിർമ്മാണത്തിൽ പിഴവുകളുണ്ടെന്നും ഇയാൾ ആരോപിച്ചു. കേസിൽ 15.5 ലക്ഷം ദിർഹം തിരികെ ലഭിക്കണമെന്ന നിക്ഷേപകന്റെ ആവശ്യം നേരത്തെ അപ്പീൽ കോടതി തള്ളിയിരുന്നു. എന്നാൽ മുൻ ഉത്തരവിലെ വൈരുദ്ധ്യങ്ങളും വിദഗ്ധ സമിതിയുടെ റിപ്പോർട്ടിലെ പിഴവുകളും കൃത്യമായി പരിശോധിച്ചില്ലെന്ന് ചൂണ്ടിക്കാട്ടിയാണ് ഇപ്പോൾ കാസേഷൻ കോടതി അപ്പീൽ വിധി റദ്ദാക്കി കേസ് വീണ്ടും കേൾക്കാൻ ഉത്തരവിട്ടിരിക്കുന്നത്.