ഹോർമുസ് കടലിടുക്കിൽ ആധിപത്യം സ്ഥാപിക്കാൻ ആരെയും അനുവദിക്കില്ലെന്ന് യുഎഇ

യുഎഇ : ഹോർമുസ് കടലിടുക്കിന്റെ (Strait of Hormuz) മേൽ ആധിപത്യം സ്ഥാപിക്കാനോ അതിനെ ആഗോള സമ്പദ്‌വ്യവസ്ഥയ്‌ക്കെതിരെയുള്ള ആയുധമാക്കാനോ ഒരു കക്ഷിയെയും അനുവദിക്കരുതെന്ന് യുഎഇ വിദേശ വ്യാപാര മന്ത്രി ഡോ. താനി ബിൻ അഹമ്മദ് അൽ സെയൂദി പ്രസ്താവിച്ചു. പ്രാഗിൽ നടന്ന ഗ്ലോബ്‌സെക് ഫോറം 2026-ൽ (GLOBSEC Forum 2026) സംസാരിക്കുകയായിരുന്നു അദ്ദേഹം. ആഗോള വ്യാപാരത്തിനും ഊർജ്ജ വിതരണത്തിനും നിർണായകമായ ഹോർമുസ് കടലിടുക്ക് എപ്പോഴും സ്വതന്ത്രവും തുറന്നതുമായ അന്താരാഷ്ട്ര ജലപാതയായി നിലനിൽക്കണമെന്ന് അദ്ദേഹം ഊന്നിപ്പറഞ്ഞു. യുഎഇ ഉൾപ്പെടെയുള്ള ജിസിസി രാജ്യങ്ങൾക്ക് നേരെ ഇറാൻ നടത്തുന്ന നീക്കങ്ങളുടെയും ഹോർമുസ് കടലിടുക്ക് അടച്ചുപൂട്ടിയതിന്റെയും പശ്ചാത്തലത്തിൽ ആഗോള ഊർജ്ജ വിതരണത്തിലുണ്ടായ തടസ്സങ്ങൾ മറികടക്കാൻ യുഎഇ സ്വീകരിച്ച അടിയന്തര നടപടികൾ അദ്ദേഹം വിശദീകരിച്ചു. അന്താരാഷ്ട്ര വിപണിയിലെ സമ്മർദ്ദം കുറയ്ക്കുന്നതിനും വിതരണ ശൃംഖലയുടെ തുടർച്ച ഉറപ്പാക്കുന്നതിനുമായി ഹോർമുസ് കടലിടുക്കിനെ മറികടന്നുപോകുന്ന ബദൽ വ്യാപാര പാതകൾ യുഎഇ ഇതിനകം സജീവമാക്കിയിട്ടുണ്ടെന്നും മന്ത്രി വ്യക്തമാക്കി.