ദുബായ് : ദുബായിലെ വിദ്യാഭ്യാസ സ്ഥാപനങ്ങൾക്കായുള്ള പാർക്കിംഗ് സബ്‌സ്‌ക്രിപ്‌ഷൻ സേവനങ്ങൾ കൂടുതൽ എളുപ്പമാക്കുന്നതിനായി നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റിയും (KHDA) പാർക്കിൻ കമ്പനിയും (Parkin Company PJSC) തന്ത്രപരമായ പങ്കാളിത്തത്തിൽ ഒപ്പുവെച്ചു. വിദ്യാർത്ഥികൾക്കും അധ്യാപകർ ഉൾപ്പെടെയുള്ള ജീവനക്കാർക്കും പാർക്കിംഗ് സബ്‌സ്‌ക്രിപ്‌ഷൻ അപേക്ഷകൾ ലളിതമാക്കാൻ സഹായിക്കുന്ന പൂർണ്ണമായ ഡിജിറ്റൽ സംവിധാനമാണ് ഈ പങ്കാളിത്തത്തിലൂടെ അവതരിപ്പിക്കുന്നത്. നിലവിൽ, വിദ്യാഭ്യാസ സ്ഥാപനങ്ങളിൽ നിന്നുള്ള മാനുവൽ അനുമതികളും യോഗ്യത തെളിയിക്കുന്നതിനുള്ള രേഖകൾ നേരിട്ട് സമർപ്പിക്കുന്നതുമാണ് നിലവിലുള്ള രീതി.
പുതിയ കരാർ പ്രകാരം, കെഎച്ച്‌ഡിഎയും പാർക്കിനും തങ്ങളുടെ ഡിജിറ്റൽ സംവിധാനങ്ങൾ പരസ്പരം ബന്ധിപ്പിക്കും. ഇതോടെ, വിദ്യാഭ്യാസ സ്ഥാപനങ്ങൾക്കായുള്ള പ്രത്യേക പാർക്കിംഗ് സബ്‌സ്‌ക്രിപ്‌ഷൻ ആവശ്യമുള്ള അപേക്ഷകരുടെ യോഗ്യത തത്സമയം (real-time) പരിശോധിക്കാൻ സാധിക്കും. വ്യക്തിഗത വിവരങ്ങളുടെ സുരക്ഷിതത്വം പൂർണ്ണമായി ഉറപ്പാക്കിക്കൊണ്ട് തന്നെ, അനാവശ്യമായ ഓഫീസ് നടപടികൾ കുറയ്ക്കാനും ഉപഭോക്താക്കൾക്ക് കൂടുതൽ മികച്ച അനുഭവം നൽകാനും ഈ പുതിയ ഡിജിറ്റൽ സംവിധാനം സഹായിക്കുമെന്ന് ഇരു സ്ഥാപനങ്ങളും വ്യക്തമാക്കി.