ദുബായ് : തങ്ങളുടെ ബിസിനസ്സ് പ്രവർത്തനങ്ങളുടെ കാതലായ ഭാഗങ്ങളിലേക്ക് കൃത്രിമബുദ്ധി (AI) പൂർണ്ണമായി സംയോജിപ്പിക്കുന്നതിനായി ദുബായ് ഹോൾഡിംഗ് പ്രമുഖ ആഗോള സാങ്കേതികവിദ്യാ കമ്പനിയായ മൈക്രോസോഫ്റ്റുമായി (Microsoft) പങ്കാളിത്തം പ്രഖ്യാപിച്ചു. മിഡിൽ ഈസ്റ്റ്, ആഫ്രിക്ക (MENA) മേഖലയിൽ ഇത്രയും വലിയ തോതിൽ എഐ സാങ്കേതികവിദ്യ ബിസിനസ്സ് തലത്തിൽ നടപ്പിലാക്കുന്ന ആദ്യത്തെ സ്ഥാപനങ്ങളിലൊന്നായി ദുബായ് ഹോൾഡിംഗ് ഇതോടെ മാറും. അത്യാധുനിക സാങ്കേതികവിദ്യകൾ തങ്ങളുടെ പ്രവർത്തന മാതൃകയിലേക്ക് കൊണ്ടുവരുന്നതിനും വിവിധ മേഖലകളിൽ എഐ ഉപയോഗം വ്യാപിപ്പിക്കാനുള്ള യുഎഇയുടെ വലിയ ലക്ഷ്യങ്ങൾക്കും പിന്തുണ നൽകുന്നതാണ് ഈ പുതിയ സഖ്യം.
ഈ കരാർ അനുസരിച്ച് ദുബായ് ഹോൾഡിംഗിന് കീഴിലുള്ള റിയൽ എസ്റ്റേറ്റ്, ഹോസ്പിറ്റാലിറ്റി, റീട്ടെയ്ൽ, എന്റർടൈൻമെന്റ്, നിക്ഷേപങ്ങൾ, കമ്മ്യൂണിറ്റി മാനേജ്‌മെന്റ് തുടങ്ങിയ എല്ലാ പ്രമുഖ ബിസിനസ്സ് മേഖലകളിലെയും പ്രവർത്തനങ്ങളിലും തീരുമാനങ്ങൾ എടുക്കുന്ന പ്രക്രിയകളിലും എഐ സാങ്കേതികവിദ്യ ഉൾപ്പെടുത്തും. ഗ്രൂപ്പിലെ ജീവനക്കാർക്ക് ഒരൊറ്റ പ്ലാറ്റ്‌ഫോമിലൂടെ (unified interface) എഐ ടൂളുകൾ ലഭ്യമാക്കുമെന്നും, ഇത് അവരുടെ ദൈനംദിന ഉത്തരവാദിത്തങ്ങളിൽ നേരിട്ട് ഉപയോഗിക്കാൻ സാധിക്കുമെന്നും കമ്പനി അറിയിച്ചു. ദൈനംദിന ജോലികൾ സ്വയം ചെയ്യാനും, തൊഴിൽ രീതികൾ കൂടുതൽ സുഗമമാക്കാനും, കാര്യക്ഷമതയും ഉൽപ്പാദനക്ഷമതയും വർദ്ധിപ്പിക്കാനും സഹായിക്കുന്ന ‘എഐ ഏജന്റുകളെ’ (AI agents) ഇതിനായി വിന്യസിക്കും. എഐ ടൂളുകൾ കൃത്യമായി ഉപയോഗിക്കാൻ ജീവനക്കാരെ പ്രാപ്തരാക്കുന്നതിനായി പ്രത്യേക പരിശീലന പരിപാടികളും വർക്ക്‌ഷോപ്പുകളും പ്രാക്ടിക്കൽ ക്ലാസുകളും കമ്പനി സംഘടിപ്പിക്കുമെന്നും ദുബായ് ഹോൾഡിംഗ് വ്യക്തമാക്കി.