ദുബായ് : ലോകത്തിലെ ഏറ്റവും കാര്യക്ഷമവും മികച്ചതുമായ ഭരണകൂടങ്ങളുടെ പട്ടികയിൽ ആദ്യ 10 സ്ഥാനങ്ങളിൽ ഇടംപിടിച്ച് യുഎഇ വീണ്ടും കരുത്ത് തെളിയിച്ചു. 2026-ലെ ചാൻഡലർ ഗുഡ് ഗവൺമെന്റ് ഇൻഡക്സിലാണ് (CGGI) യുഎഇ ഈ മികച്ച നേട്ടം കൈവരിച്ചത്. മുൻകൂട്ടി കാര്യങ്ങൾ ആസൂത്രണം ചെയ്യാനും മാറ്റങ്ങളോട് വേഗത്തിൽ പൊരുത്തപ്പെടാനുമുള്ള യുഎഇയുടെ ഭരണമാതൃകയുടെ വിജയമാണ് ഈ അംഗീകാരം. നവീകരണം, സ്ഥാപനങ്ങളുടെ കാര്യക്ഷമത, ആഗോള മാറ്റങ്ങൾക്ക് അനുസരിച്ച് മാറുക എന്നിവയിലൂടെ ഭാവി ലക്ഷ്യമാക്കിയുള്ള ഒരു ഭരണകൂടം കെട്ടിപ്പടുക്കുക എന്ന യുഎഇ നേതൃത്വത്തിന്റെ കാഴ്ചപ്പാടാണ് ഇതിലൂടെ പ്രതിഫലിക്കുന്നത്.
നയങ്ങളുടെ കാര്യക്ഷമത, സാമ്പത്തിക ആകർഷണീയത, മികച്ച ജീവിതനിലവാരം, ജനങ്ങളിലുള്ള നിക്ഷേപം എന്നിവയെല്ലാം ഒന്നിപ്പിക്കുന്ന ഒരു സംയോജിത ഭരണസംവിധാനമാണ് യുഎഇയുടേത്. രാജ്യത്തിന്റെ ഈ പുരോഗതി “വി ദി യുഎഇ 2031” (We the UAE 2031) എന്ന വികസന കാഴ്ചപ്പാടിന് കരുത്തുപകരുന്നതാണ്. ലോകത്തിലെ 133 രാജ്യങ്ങളിലെ ഭരണമികവ് വിലയിരുത്തുന്ന ഏറ്റവും സമഗ്രമായ സൂചികകളിലൊന്നാണ് ചാൻഡലർ ഗുഡ് ഗവൺമെന്റ് ഇൻഡക്സ്. വേഗതയേറിയ സേവനങ്ങൾ, പ്രതിസന്ധികളെ നേരിടാനുള്ള സന്നദ്ധത, പുതിയ അവസരങ്ങൾ സൃഷ്ടിക്കാനുള്ള കഴിവ് എന്നിവയിലാണ് യുഎഇ ഭരണകൂടം മുന്നിട്ടുനിൽക്കുന്നത്.
പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ കാഴ്ചപ്പാടും വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തുമിന്റെ മേൽനോട്ടവുമാണ് ഈ വിജയത്തിന് പിന്നിലെന്ന് കാബിനറ്റ് കാര്യ മന്ത്രി മുഹമ്മദ് അബ്ദുള്ള അൽ ഗെർഗാവി പറഞ്ഞു. യുഎഇ നേതൃത്വം നിലവിലുള്ള കാര്യങ്ങൾ മാത്രം നിയന്ത്രിക്കുന്ന ഒരു പരമ്പരാഗത ഭരണകൂടമല്ല ഉണ്ടാക്കിയത്, മറിച്ച് ഭാവി രൂപപ്പെടുത്തുകയും വെല്ലുവിളികളെ വികസനത്തിനുള്ള പുതിയ അവസരങ്ങളാക്കി മാറ്റുകയും ചെയ്യുന്ന ഭരണകൂടമാണെന്ന് അദ്ദേഹം കൂട്ടിച്ചേർത്തു. മികവ് ഒരു ശീലമാക്കിയ ദേശീയ ടീമുകളുടെ കഠിനാധ്വാനത്തിന്റെ ഫലമാണ് ഈ നേട്ടമെന്നും അദ്ദേഹം വ്യക്തമാക്കി.
മികച്ച ഭരണത്തിന്റെ കാര്യത്തിൽ അറബ് ലോകത്തും മിഡിൽ ഈസ്റ്റ് മേഖലയിലും യുഎഇ ഒന്നാം സ്ഥാനത്താണ്. ആഗോളതലത്തിൽ ഗവൺമെന്റ് നവീകരണം, തന്ത്രപരമായ മുൻഗണനകൾ നിശ്ചയിക്കാനുള്ള കഴിവ്, പദ്ധതികൾ നടപ്പിലാക്കുന്നതിലെ വഴക്കം, ബജറ്റ് മിച്ചം എന്നീ സൂചകങ്ങളിൽ യുഎഇ ലോകത്ത് ഒന്നാമതെത്തി. കൂടാതെ സർക്കാർ സേവനങ്ങളിലെ സംതൃപ്തി, സാഹചര്യങ്ങളുമായി പൊരുത്തപ്പെടാനുള്ള കഴിവ്, തൊഴിൽ അവസരങ്ങൾ സൃഷ്ടിക്കൽ എന്നിവയിൽ ലോകത്ത് രണ്ടാം സ്ഥാനവും, ദീർഘകാല കാഴ്ചപ്പാട്, വിവിധ വകുപ്പുകൾ തമ്മിലുള്ള ഏകോപനം എന്നിവയിൽ മൂന്നാം സ്ഥാനവും യുഎഇ സ്വന്തമാക്കി.