അബുദാബി : യുഎഇ സായുധ സേന ഏകീകരണത്തിന്റെ അമ്പതാം വാർഷിക വേളയിൽ സൈന്യത്തിന് ആദരവും അഭിനന്ദനങ്ങളുമായി രാജ്യത്തെ ഉന്നത ഭരണാധികാരികൾ രംഗത്തെത്തി. രാജ്യത്തിന്റെ സുരക്ഷയുടെയും സ്ഥിരതയുടെയും ഐക്യത്തിന്റെയും നെടുംതൂണായ സായുധ സേനയുടെ ഈ അർദ്ധ സെഞ്ച്വറി ആഘോഷം ദേശീയ കരുത്തിന്റെ അടയാളമാണെന്ന് നേതാക്കൾ വിശേഷിപ്പിച്ചു. കഴിഞ്ഞ അഞ്ച് പതിറ്റാണ്ടുകളായി രാജ്യം കൈവരിച്ച നേട്ടങ്ങളുടെ കാവലാളായി സൈന്യം നിലകൊള്ളുന്നതിനെ അവർ പ്രശംസിച്ചു.
യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ സോഷ്യൽ മീഡിയ പ്ലാറ്റ്‌ഫോമായ എക്സിലൂടെ (X) സൈനികർക്ക് ആശംസകൾ നേർന്നു. രാജ്യത്തിന്റെയും ജനങ്ങളുടെയും സുരക്ഷയ്ക്കായി അശ്രാന്തമായി പരിശ്രമിക്കുന്ന ധീരരായ സ്ത്രീപുരുഷന്മാരോടുള്ള തന്റെ ആഴമായ നന്ദി അദ്ദേഹം രേഖപ്പെടുത്തി. സൈനികരുടെ അചഞ്ചലമായ അർപ്പണബോധവും ത്യാഗവും യുഎഇയെ സ്വന്തം വീടായി കാണുന്ന ഓരോരുത്തർക്കും അനന്തമായ അഭിമാനത്തിന് കാരണമാണെന്നും ചരിത്രത്തിലെ ഈ സുപ്രധാന നിമിഷത്തിൽ എല്ലാവരെയും അഭിനന്ദിക്കുന്നുവെന്നും അദ്ദേഹം പറഞ്ഞു.
സായുധ സേനയുടെ സുവർണ്ണ ജൂബിലിയിൽ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോർട്ട് ചെയർമാനുമായ ഷെയ്ഖ് മൻസൂർ ബിൻ സായിദ് അൽ നഹ്യാനും ആശംസകൾ അറിയിച്ചു. കഴിഞ്ഞ അമ്പത് വർഷം അഭിമാനത്തിന്റേതാണെന്നും യുഎഇയുടെ ദേശീയ പതാക സംരക്ഷിക്കാൻ സ്വയം സമർപ്പിച്ച സൈനികരാണ് രാജ്യത്തിന്റെ കവചവും നട്ടെല്ലുമെന്നും അദ്ദേഹം പറഞ്ഞു. ധീരമായ ഈ ചരിത്രം ആഘോഷിക്കുമ്പോൾ തന്നെ കൂടുതൽ ശക്തവും അഭിമാനകരവുമായ ഒരു ഭാവിയിലേക്ക് ആത്മവിശ്വാസത്തോടെ രാജ്യം മുന്നേറുകയാണെന്നും അദ്ദേഹം കൂട്ടിച്ചേർത്തു.