ദുബായ് : യുഎഇ സായുധ സേനാ ഏകീകരണത്തിന്റെ അമ്പതാം വാർഷികാഘോഷങ്ങളുടെ ഭാഗമായി ദുബായിലെ റോഡരികിലുള്ള ഡിജിറ്റൽ സ്ക്രീനുകളിൽ പ്രത്യേക ദേശീയ സന്ദേശങ്ങൾ പ്രദർശിപ്പിച്ച് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA). രാജ്യത്തിന്റെ സുരക്ഷയ്ക്കായി സൈനികർ നടത്തുന്ന അചഞ്ചലമായ സേവനങ്ങളെയും ത്യാഗങ്ങളെയും ആദരിക്കുന്നതിന്റെ ഭാഗമായാണ് ഈ നടപടി. ദുബായിലെ പ്രധാന പാതകളിലെല്ലാം സായുധ സേനയോടുള്ള നന്ദിയും കടപ്പാടും അറിയിക്കുന്ന സന്ദേശങ്ങൾ തെളിഞ്ഞുനിന്നു.
രാജ്യത്തോടുള്ള ഉത്തരവാദിത്തം തികഞ്ഞ ആത്മാർത്ഥതയോടെ നിറവേറ്റിയവരെയും ഇന്നും രാജ്യത്തിന്റെ അഭിമാനമായി നിലകൊള്ളുന്നവരെയെയും ആർടിഎ അഭിവാദ്യം ചെയ്തു. സായുധ സേനാംഗങ്ങളുടെ സേവനങ്ങൾക്ക് അംഗീകാരം നൽകുന്നതിനൊപ്പം ജനങ്ങളിൽ ദേശീയ വികാരം ഉണർത്തുന്നതിനും വേണ്ടിയാണ് ആർടിഎ ഇത്തരമൊരു സംരംഭം ഏറ്റെടുത്തത്. രാജ്യത്തിന്റെ കാവൽക്കാരായ സൈനികർക്ക് പൊതുസമൂഹം നൽകുന്ന വലിയ ആദരവിന്റെ പ്രതിഫലനം കൂടിയായി ഈ ദൃശ്യാവിഷ്കാരം മാറി.