അബുദാബി : യു.എ.ഇയിലെ വിദ്യാഭ്യാസവും തൊഴിൽ വിപണിയും തമ്മിലുള്ള വിടവ് നികത്തുക എന്ന ലക്ഷ്യത്തോടെ അത്യാധുനികമായ ‘യു.എ.ഇ സ്കിൽസ് പ്ലാറ്റ്‌ഫോം’ (UAE Skills Platform) പ്രവർത്തനമാരംഭിച്ചു. വിദ്യാഭ്യാസ-മനുഷ്യവികസന-സാമൂഹിക വികസന കൗൺസിലിന്റെ നിർദ്ദേശപ്രകാരം ഉന്നത വിദ്യാഭ്യാസ-ശാസ്ത്ര ഗവേഷണ മന്ത്രാലയവും മാനവശേഷി-സ്വദേശിവൽക്കരണ മന്ത്രാലയവും ചേർന്നാണ് ഈ പദ്ധതിക്ക് തുടക്കമിട്ടത്. ഭാവിയിലെ തൊഴിൽ ആവശ്യങ്ങൾക്ക് അനുസൃതമായി യുവാക്കളുടെ കഴിവുകൾ വികസിപ്പിക്കാനും വിദ്യാഭ്യാസ രീതികളിൽ മാറ്റം വരുത്താനുമാണ് ഈ പ്ലാറ്റ്‌ഫോമിലൂടെ രാജ്യം ലക്ഷ്യമിടുന്നത്.
രാജ്യത്തിന്റെ സാമ്പത്തിക മുൻഗണനകളും വിദ്യാഭ്യാസ നയങ്ങളും തമ്മിൽ കോർത്തിണക്കിക്കൊണ്ടുള്ള ഒരു പുതിയ മനുഷ്യവിഭവശേഷി വികസന മാതൃകയാണിത്. അന്താരാഷ്ട്ര തലത്തിലുള്ള മികച്ച രീതികൾ പിന്തുടർന്ന് നിർമ്മിച്ചിരിക്കുന്ന ഈ പ്ലാറ്റ്‌ഫോം, തൊഴിൽ വിപണിക്ക് യഥാർത്ഥത്തിൽ ആവശ്യമുള്ള കഴിവുകൾ എന്തൊക്കെയാണെന്ന് തിരിച്ചറിയാനും അതനുസരിച്ച് വിദ്യാഭ്യാസ പാഠ്യപദ്ധതികൾ പരിഷ്കരിക്കാനും സഹായിക്കും. രാജ്യത്തിന്റെ വളർച്ചാ അജണ്ടയിൽ മനുഷ്യവിഭവശേഷി വികസനത്തിന് വലിയ പ്രാധാന്യമുണ്ടെന്ന് ഉപപ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് അബ്ദുള്ള ബിൻ സായിദ് അൽ നഹ്യാൻ വ്യക്തമാക്കി.
വ്യക്തമായ അക്കാദമിക്-കരിയർ പാതകളിലൂടെ വ്യക്തികളെ ശാക്തീകരിക്കുന്നത് ഒരു വിജ്ഞാനസമൂഹത്തെ കെട്ടിപ്പടുക്കാൻ സഹായിക്കുമെന്ന് കൗൺസിൽ വൈസ് ചെയർപേഴ്സൺ ഷെയ്ഖ മറിയം ബിന്ത് മുഹമ്മദ് ബിൻ സായിദ് അൽ നഹ്യാൻ അഭിപ്രായപ്പെട്ടു. ഡാറ്റയുടെ അടിസ്ഥാനത്തിൽ പ്രവർത്തിക്കുന്ന ഈ ഏകീകൃത സംവിധാനം സാമ്പത്തികവും സാങ്കേതികവുമായ മാറ്റങ്ങൾക്കനുസരിച്ച് പുതിയ അറിവുകൾ നേടാൻ പ്രൊഫഷണലുകളെയും വിദ്യാർത്ഥികളെയും സഹായിക്കും. ശരിയായ കരിയർ തീരുമാനങ്ങൾ എടുക്കുന്നതിനും ഉന്നത വിദ്യാഭ്യാസത്തിന് അനുയോജ്യമായ വിഷയങ്ങൾ തിരഞ്ഞെടുക്കുന്നതിനും ഈ പ്ലാറ്റ്‌ഫോം ഒരു പ്രായോഗിക വഴികാട്ടിയായി പ്രവർത്തിക്കും.