വിട്ടുമാറാത്ത രോഗങ്ങൾക്കുള്ള 168 മരുന്നുകളുടെ വില 60 ശതമാനം വരെ കുറച്ച് യുഎഇ

അബുദാബി: ഹൃദ്രോഗം, പ്രമേഹം, അർബുദം തുടങ്ങിയ വിട്ടുമാറാത്തതും ഗുരുതരവുമായ രോഗങ്ങൾക്കുള്ള 168 ഇനം മരുന്നുകളുടെ വില വലിയ തോതിൽ കുറച്ച് യുഎഇ എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് (Emirates Drug Establishment). വിവിധ രോഗങ്ങൾക്കുള്ള മരുന്നുകളുടെ റീട്ടെയിൽ വിലയിൽ 5 ശതമാനം മുതൽ 60 ശതമാനം വരെയാണ് കുറവ് വരുത്തിയിരിക്കുന്നത്. ഹൃദ്രോഗം, പ്രമേഹം, ഉയർന്ന രക്തസമ്മർദ്ദം, കാൻസർ, പക്ഷാഘാതം, ഉയർന്ന കൊളസ്ട്രോൾ, ഗ്യാസ്ട്രോ ഇൻഡസ്റ്റൈനൽ രോഗങ്ങൾ, മാനസിക-നാഡീസംബന്ധമായ അസ്വസ്ഥതകൾ, നേത്രരോഗങ്ങൾ, ആസ്ത്മ എന്നിവയ്ക്കുള്ള മരുന്നുകളാണ് ഈ വിലക്കുറവിന്റെ പരിധിയിൽ വരുന്നത്. മെയ് 30 മുതൽ പുതിയ വില യുഎഇയിലുടനീളം പ്രാബല്യത്തിൽ വരുമെന്ന് ഔദ്യോഗിക ഉത്തരവിൽ വ്യക്തമാക്കുന്നു. എമിറേറ്റ്സ് ഡ്രഗ് എസ്റ്റാബ്ലിഷ്മെന്റിന്റെ 2026-ലെ ഡിസിഷൻ നമ്പർ 12 പ്രകാരമാണ് ഈ ചരിത്രപരമായ നടപടി. വിലയേറിയ ബയോളജിക് മരുന്നുകൾക്കും കാൻസർ ചികിത്സയ്ക്കുള്ള മരുന്നുകൾക്കുമാണ് ഏറ്റവും കൂടുതൽ ഇളവ് ലഭിച്ചിരിക്കുന്നത്. ഹൃദ്രോഗികൾക്ക് നൽകുന്ന ‘വെർക്യൂവോ’ (Verquvo) മരുന്നുകളുടെ വിലയിലും വലിയ മാറ്റമുണ്ട്. യുഎഇയിലെ വിവിധ എമിറേറ്റുകളിലെ ഫാർമസികളിൽ പുതിയ വിലവിവരങ്ങൾ ഇതിനകം രേഖപ്പെടുത്തിത്തുടങ്ങിയിട്ടുണ്ട്. സാധാരണക്കാരായ രോഗികൾക്ക് വലിയ സാമ്പത്തിക ആശ്വസം നൽകുന്നതാണ് യുഎഇ സർക്കാരിന്റെ ഈ പുതിയ ജീവകാരുണ്യപരമായ തീരുമാനം.