ഫിലിപ്പീൻസിലെ ഭൂകമ്പ ബാധിതർക്ക് അടിയന്തര സഹായവുമായി യുഎഇ

മനില : ഫിലിപ്പീൻസിലെ സരംഗാനി (Sarangani) പ്രവിശ്യയിലുണ്ടായ ശക്തമായ ഭൂകമ്പത്തിൽ ദുരിതമനുഭവിക്കുന്നവർക്ക് അടിയന്തര മാനുഷിക സഹായങ്ങളുമായി യുഎഇ. യുഎഇയുടെ പ്രത്യേക ദുരിതാശ്വാസ സംഘം ഫിലിപ്പീൻസിലെ യുഎഇ അംബാസഡർ മുഹമ്മദ് ഉബൈദ് സലേം അൽ ഖതാം അൽ സാബിയുടെ സാന്നിധ്യത്തിൽ പ്രാദേശിക അധികാരികളുമായി സഹകരിച്ച് ദുരന്തബാധിത പ്രദേശങ്ങളിൽ നേരിട്ടെത്തി സഹായങ്ങൾ വിതരണം ചെയ്തു.
ആദ്യഘട്ടമായി എഴുന്നൂറോളം ഭക്ഷ്യധാന്യ കിറ്റുകളും അഞ്ഞൂറോളം ഗാലൻ കുടിവെള്ളവും ദുരിതബാധിത കുടുംബങ്ങൾക്ക് കൈമാറി. വരും ദിവസങ്ങളിൽ കൂടുതൽ പ്രദേശങ്ങളിലേക്ക് സഹായമെത്തിക്കാനാണ് യുഎഇ ലക്ഷ്യമിടുന്നത്. ഇതിന്റെ ഭാഗമായി ഇരുപതിനായിരത്തിലധികം ഭക്ഷ്യക്കിറ്റുകളും അത്രതന്നെ ഗാലൻ കുടിവെള്ളവും വിതരണം ചെയ്യാനുള്ള വിപുലമായ പദ്ധതിയാണ് യുഎഇ ദുരിതാശ്വാസ സംഘം തയ്യാറാക്കിയിരിക്കുന്നത്. ലോകമെമ്പാടും പ്രകൃതിദുരന്തങ്ങൾ നേരിടുന്ന ജനതയ്ക്ക് താങ്ങാവുക എന്ന യുഎഇയുടെ മാനുഷിക മൂല്യങ്ങളുടെയും അന്താരാഷ്ട്ര സഹകരണത്തിന്റെയും ഭാഗമായാണ് ഈ അടിയന്തര ഇടപെടൽ.