എട്ട് മാസത്തിനിടെ 13,650-ലധികം ഇ-സ്കൂട്ടറുകൾ പിടിച്ചെടുത്ത് ദുബായ് പൊലീസ്

ദുബായ്: റോഡ് സുരക്ഷാ മാനദണ്ഡങ്ങൾ ലംഘിച്ചതിന് ഈ വർഷത്തെ ആദ്യ എട്ട് മാസത്തിനിടെ 13,657 ഇ-സ്കൂട്ടറുകൾ ദുബായ് പൊലീസ് പിടിച്ചെടുത്തു. അപകടങ്ങളും ഗുരുതരമായ പരിക്കുകളും ജീവഹാനിയും ഒഴിവാക്കുന്നതിന്റെ ഭാഗമായി സംഘടിപ്പിച്ച പരിശോധനകളിലാണ് നടപടി. സുരക്ഷ മുൻനിർത്തി വരും ദിവസങ്ങളിലും കർശന പരിശോധന തുടരുമെന്ന് ട്രാഫിക് വിഭാഗം ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ വ്യക്തമാക്കി.

മണിക്കൂറിൽ 60 കിലോമീറ്ററിൽ കൂടുതൽ വേഗതയുള്ള പ്രധാന റോഡുകളിൽ ഇ-സ്കൂട്ടറുകൾ ഓടിക്കുന്നത് നിരോധിച്ചിട്ടുണ്ടെങ്കിലും പലരും ഇത് ലംഘിക്കുന്നതായി പൊലീസ് ചൂണ്ടിക്കാട്ടി. ട്രാഫിക്കിന് എതിർദിശയിൽ ഓടിക്കുക, കാൽനടയാത്രക്കാരുടെ പാതകൾ, വാണിജ്യ വിപണികൾ, ഇടുങ്ങിയ ഗലികൾ എന്നിവയിലൂടെ സഞ്ചരിക്കുക, അശ്രദ്ധമായി റോഡ് മുറിച്ചുകടക്കുക തുടങ്ങിയ നിയമലംഘനങ്ങൾക്കെതിരെയും നടപടിയെടുത്തു. ഹെൽമറ്റ്, റിഫ്ലക്റ്റീവ് ജാക്കറ്റ് എന്നിവ ധരിക്കാത്തതും മുന്നിലും പിന്നിലും വെളിച്ചവും റിഫ്ലക്ടറുകളും ഇല്ലാത്തതും പിഴവുകളായി പൊലീസ് കണക്കാക്കുന്നുണ്ട്. നിശ്ചിത ട്രാക്കുകളിലൂടെ മാത്രം വേഗത പാലിച്ചു യാത്ര ചെയ്യാൻ അധികൃതർ മുന്നറിയിപ്പ് നൽകി.