ദുബായ് : ഇന്ത്യൻ രൂപ, പാകിസ്ഥാൻ രൂപ, ഫിലിപ്പൈൻ പെസോ എന്നിവയുടെ മൂല്യം ഇടിഞ്ഞുനിൽക്കുന്നത് യുഎഇയിലെ പ്രവാസികൾക്ക് നാട്ടിലേക്ക് പണമയക്കാൻ മികച്ച അവസരമൊരുക്കുന്നു. ദിർഹത്തിന് പകരമായി ലഭിക്കുന്ന തുക വർദ്ധിച്ചതാണ് പ്രവാസികൾക്ക് ആശ്വാസമാകുന്നത്. കഴിഞ്ഞ ദിവസം ഇന്ത്യൻ രൂപ ദിർഹത്തിനെതിരെ 25.93 എന്ന റെക്കോർഡ് താഴ്ന്ന നിലവാരത്തിലേക്ക് എത്തിയിരുന്നു. ഇത് പ്രവാസി ഇന്ത്യക്കാരെ സംബന്ധിച്ച് പണം നാട്ടിലേക്ക് അയക്കാൻ ഏറ്റവും അനുയോജ്യമായ സമയമാണ്.
രൂപയുടെ മൂല്യം ഇനിയും ഇടിയാൻ സാധ്യതയുണ്ടെന്ന വിലയിരുത്തലിലാണ് പല പ്രവാസികളും. അതിനാൽ കൈവശമുള്ള പണം മുഴുവനായി അയക്കാതെ, ഒരു ഭാഗം ഇപ്പോൾ അയക്കുകയും ബാക്കി തുക മികച്ച നിരക്കിനായി മാറ്റിവെക്കുകയും ചെയ്യുന്ന രീതിയാണ് പല കുടുംബങ്ങളും സ്വീകരിക്കുന്നതെന്ന് എക്സ്ചേഞ്ച് ഹൗസുകൾ വ്യക്തമാക്കുന്നു. രൂപയ്ക്ക് പുറമെ പാകിസ്ഥാൻ രൂപയുടെയും ഫിലിപ്പൈൻ പെസോയുടെയും മൂല്യം കുറഞ്ഞുനിൽക്കുന്നത് ആ രാജ്യങ്ങളിൽ നിന്നുള്ള പ്രവാസികൾക്കും കൂടുതൽ തുക നാട്ടിലേക്ക് അയക്കാൻ സഹായകരമാകുന്നുണ്ട്.