അബുദാബി : റഷ്യയും ഉക്രെയ്നും തമ്മിലുള്ള പുതിയ തടവുകാരുടെ കൈമാറ്റ ചർച്ചകളിൽ വിജയകരമായി മധ്യസ്ഥത വഹിച്ച് യുഎഇ. ഇരുപക്ഷത്തുനിന്നും 185 തടവുകാരെ വീതമാണ് (ആകെ 370 പേർ) പുതിയ മധ്യസ്ഥ ചർച്ചകളിലൂടെ മോചിപ്പിച്ചത്. ഇതോടെ യുഎഇയുടെ മധ്യസ്ഥതയിൽ ഇരുരാജ്യങ്ങളും തമ്മിൽ ഇതുവരെ കൈമാറ്റം ചെയ്ത ആകെ തടവുകാരുടെ എണ്ണം 7,471 ആയി ഉയർന്നു.
വിശ്വാസയോഗ്യമായ അന്താരാഷ്ട്ര മധ്യസ്ഥൻ എന്ന നിലയിൽ യുഎഇയുടെ ശ്രമങ്ങളോട് പൂർണ്ണമായി സഹകരിച്ചതിനും പ്രതിസന്ധി പരിഹരിക്കാനുള്ള യുഎഇയുടെ പ്രതിജ്ഞാബദ്ധതയെ മാനിച്ചതിനും ഇരുരാജ്യങ്ങൾക്കും യുഎഇ വിദേശകാര്യ മന്ത്രാലയം (MoFA) നന്ദി അറിയിച്ചു. ഇരുരാജ്യങ്ങളും തമ്മിലുള്ള തടവുകാരുടെ കൈമാറ്റത്തിൽ യുഎഇ വിജയകരമായി പൂർത്തിയാക്കുന്ന 24-ാമത്തെ മധ്യസ്ഥതയാണിത്. റഷ്യ, ഉക്രെയ്ൻ എന്നീ രാജ്യങ്ങളുമായി യുഎഇ പുലർത്തുന്ന ശക്തമായ ഉഭയകക്ഷി ബന്ധത്തിന്റെ തെളിവാണ് ഈ വിജയമെന്ന് മന്ത്രാലയം വ്യക്തമാക്കി. ഉക്രെയ്ൻ സംഘർഷത്തിന് സമാധാനപരമായ പരിഹാരം കണ്ടെത്തുന്നതിനും അഭയാർത്ഥികളും തടവുകാരും ഉൾപ്പെടെയുള്ളവർ നേരിടുന്ന മാനുഷിക പ്രത്യാഘാതങ്ങൾ ലഘൂകരിക്കുന്നതിനുമുള്ള എല്ലാ ശ്രമങ്ങൾക്കും യുഎഇ തുടർന്നും പൂർണ്ണ പിന്തുണ നൽകുമെന്നും വിദേശകാര്യ മന്ത്രാലയം കൂട്ടിച്ചേർത്തു.