ഷാർജ : യുഎഇയിലെ പ്രമുഖ കുടുംബസൗഹൃദ വിനോദസഞ്ചാര കേന്ദ്രമെന്ന പദവി കൂടുതൽ ശക്തമാക്കാൻ വിപുലമായ പരിപാടികളോടെ ‘ഷാർജ സമ്മർ 2026’ (Sharjah Summer 2026) സീസണിന് തുടക്കമായി. ഓഗസ്റ്റ് 31 വരെ നീണ്ടുനിൽക്കുന്ന ഈ സമ്മർ പ്രോഗ്രാമിൽ ആകർഷകമായ പ്രൊമോഷനുകൾ, സാംസ്കാരിക-വിനോദ പരിപാടികൾ, കുടുംബങ്ങൾക്കായുള്ള പ്രത്യേക ആക്റ്റിവിറ്റികൾ എന്നിവ ഉൾപ്പെടുത്തിയിട്ടുണ്ട്. ഇതാദ്യമായാണ് ഹോട്ടലുകൾ, ഷോപ്പിങ് മാളുകൾ, വിനോദകേന്ദ്രങ്ങൾ എന്നിവയെ പങ്കാളികളാക്കിക്കൊണ്ട് 100 ദിവസം നീണ്ടുനിൽക്കുന്ന വിപുലമായ ക്യാമ്പയിനായി ‘ഷാർജ സമ്മർ ഓഫറുകൾ’ സംഘടിപ്പിക്കുന്നത്.
സഞ്ചാരികൾക്കായി ചരിത്രപ്രസിദ്ധമായ ‘ഹാർട്ട് ഓഫ് ഷാർജ’, അൽ ദൈദ് കോട്ട, അൽ ദൈദ് ശരിയ സൂഖ്, ഖോർഫക്കാനിലെ സൂഖ് ഷർഖ്, ഓൾഡ് മാർക്കറ്റ് മ്യൂസിയം തുടങ്ങിയ സാംസ്കാരിക പൈതൃക കേന്ദ്രങ്ങളിൽ പ്രത്യേക സൗകര്യങ്ങൾ ഒരുക്കിയിട്ടുണ്ട്. ഇതിനുപുറമെ, ഷാർജയിലെ 16-ലധികം മ്യൂസിയങ്ങളിലും കുട്ടികൾക്കും കുടുംബങ്ങൾക്കുമായി വൈവിധ്യമാർന്ന വിദ്യാഭ്യാസ-വിനോദ പരിപാടികൾ നടക്കും. ‘ഹൗസ് ഓഫ് വിസ്ഡം’ (House of Wisdom) ലൈബ്രറിയിൽ ജൂൺ, ജൂലൈ മാസങ്ങളിൽ 2D, 3D ഡിസൈനിങ്, ആർട്ടിഫിഷ്യൽ ഇന്റലിജൻസ് (AI) കാർട്ടൂൺ നിർമ്മാണം, യോഗ, കുട്ടികൾക്കായുള്ള സ്റ്റെം (STEM) പ്രോഗ്രാമുകൾ എന്നിവ നടക്കും. ഡിജിറ്റൽ സംവിധാനങ്ങളിലൂടെ മ്യൂസിയങ്ങളും ചരിത്ര സ്മാരകങ്ങളും 360 ഡിഗ്രിയിൽ സന്ദർശിക്കാൻ വെർച്വൽ ടൂറുകളും ഒരുക്കിയിട്ടുണ്ട്. വിവിധ പരിപാടികളെക്കുറിച്ചും ആകർഷകമായ സമ്മാന നറുക്കെടുപ്പുകളെക്കുറിച്ചും അറിയാൻ sharjahevents.ae എന്ന വെബ്സൈറ്റ് സന്ദർശിക്കാവുന്നതാണ്.