ദുബായ് : യുഎസും ഇറാനും തമ്മിലുള്ള നയതന്ത്ര തർക്കങ്ങളും സൈനിക നീക്കങ്ങളും ശക്തമാകുന്ന പശ്ചാത്തലത്തിൽ മിഡിൽ ഈസ്റ്റിലെ പുതിയ സംഭവവികാസങ്ങളെ സൂക്ഷ്മമായി നിരീക്ഷിച്ച് യുഎഇയും ഗൾഫ് രാജ്യങ്ങളും. ഇരുരാജ്യങ്ങളും തമ്മിലുള്ള താല്ക്കാലിക വെടിനിർത്തൽ അവസാനിച്ചതായി യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചെങ്കിലും ചർച്ചകൾ തുടരാൻ ഇരുവിഭാഗവും സമ്മതിച്ചിട്ടുണ്ട്. ആഗോള ഊർജ്ജ വിതരണത്തിന്റെ പ്രധാന പാതയായ ഹോർമുസ് കടലിടുക്കിന്റെ (Strait of Hormuz) സുരക്ഷയാണ് നിലവിൽ പ്രധാന ആശങ്ക. കപ്പലുകൾക്ക് ഈ പാതയിലൂടെ സുരക്ഷിതമായി കടന്നുപോകാൻ ഇറാൻ പരസ്യമായി ഉറപ്പ് നൽകണമെന്ന് യുഎസ് ആവശ്യപ്പെടുമ്പോൾ, തങ്ങളുടെ പ്രദേശത്തിന്റെ നിയന്ത്രണം വിട്ടുകൊടുക്കില്ലെന്ന നിലപാടിലാണ് ഇറാൻ.
ഒമാൻ, ഖത്തർ, പാകിസ്ഥാൻ തുടങ്ങിയ രാജ്യങ്ങൾ മധ്യസ്ഥ ചർച്ചകൾക്ക് മുൻകൈ എടുക്കുന്നുണ്ട്. തർക്കം നീണ്ടുപോയാൽ ഹോർമുസ് കടലിടുക്കിലെ തടസ്സങ്ങൾ കാരണം ആഗോള വിപണിയിൽ എണ്ണവിലയും വിമാന സർവീസുകളുടെ ചെലവും വർദ്ധിച്ചേക്കാം. നിലവിൽ സ്വർണ്ണവിലയിലും ചാഞ്ചാട്ടങ്ങൾ പ്രകടമാണ്. മേഖലയിലെ വിമാന സർവീസുകളെയും വ്യോമപാതകളെയും ഇത് ബാധിക്കാൻ സാധ്യതയുള്ളതിനാൽ യുഎഇ നിവാസികൾ എയർലൈൻ അപ്ഡേറ്റുകൾ ശ്രദ്ധിക്കണമെന്ന് നിർദ്ദേശമുണ്ട്.
