ദുബായ് : യുഎഇ ഡ്രൈവിങ് ലൈസൻസ് കൈവശമുള്ള സ്വദേശികൾക്ക് വിദേശരാജ്യങ്ങളിൽ പരീക്ഷയോ മറ്റ് അധിക നടപടികളോ ഇല്ലാതെ വാഹനം ഓടിക്കാനും ലൈസൻസ് മാറ്റി വാങ്ങാനും (Exchange) സാധിക്കുന്ന രാജ്യങ്ങളുടെ എണ്ണം 34 ആയി ഉയർന്നതായി ആഭ്യന്തര മന്ത്രാലയം അറിയിച്ചു. മന്ത്രാലയത്തിന്റെ ‘മർഖൂസ്’ (Murkhoos) പദ്ധതി പ്രകാരമാണിത്.
യുകെ, ഓസ്ട്രിയ, ചൈന, പോർച്ചുഗൽ, നെതർലൻഡ്സ്, ഡെന്മാർക്ക്, യുഎസിലെ ടെക്സാസ് സംസ്ഥാനം ഉൾപ്പെടെയുള്ള 34 രാജ്യങ്ങളിലാണ് ഈ ആനുകൂല്യം ലഭിക്കുക. ഇതിൽ 33 രാജ്യങ്ങളിലും സന്ദർശക വിസയിൽ എത്തുന്നവർക്ക് യുഎഇ ലൈസൻസ് ഉപയോഗിച്ച് നേരിട്ട് വാഹനം ഓടിക്കാം. ഈ രാജ്യങ്ങളിൽ താമസമാക്കുകയാണെങ്കിൽ ഡ്രൈവിങ് ടെസ്റ്റുകൾ കൂടാതെ പ്രാദേശിക ലൈസൻസിലേക്ക് മാറ്റി വാങ്ങുകയും ചെയ്യാം. തിരിച്ച്, ഇതേ പദ്ധതിയിലൂടെ 53 വിദേശ രാജ്യങ്ങളിലെ പൗരന്മാർക്ക് യുഎഇയിൽ എത്തുമ്പോൾ പരീക്ഷകളില്ലാതെ യുഎഇ ലൈസൻസ് സ്വന്തമാക്കാനും സാധിക്കും.
