ഷാർജ : ഇത്തിഹാദ് റെയിൽവേ സ്റ്റേഷൻ റോഡുകളുടെ നിർമ്മാണവുമായി ബന്ധപ്പെട്ട് ഷാർജ യൂണിവേഴ്സിറ്റി സിറ്റിക്കും ഇൻസ്റ്റിറ്റ്യൂട്ട് ലാൻഡിനും ഇടയിൽ താൽക്കാലിക ഗതാഗത നിയന്ത്രണം ഏർപ്പെടുത്തുന്നു. 2026 ജൂലൈ 4 മുതൽ ഓഗസ്റ്റ് 23 വരെ ഒരു മാസത്തിലധികം കാലയളവിലാണ് ഈ റോഡ് മാറ്റങ്ങൾ ഉണ്ടാകുക. ഭാവിയാത്ര സുഗമമാക്കുന്നതിനുള്ള വികസന പ്രവർത്തനങ്ങൾ ആയതിനാൽ ഡ്രൈവർമാർ താൽക്കാലിക നിയന്ത്രണങ്ങളോട് സഹകരിക്കണമെന്ന് അധികൃതർ അഭ്യർത്ഥിച്ചു.
അബുദാബി : ലോകത്തിലെ ഏറ്റവും മികച്ച റോഡ് ശൃംഖലയും ഗതാഗത അടിസ്ഥാന സൗകര്യങ്ങളുമുള്ള രാജ്യങ്ങളുടെ പട്ടികയിൽ ആഗോള തലത്തിൽ മൂന്നാം സ്ഥാനം സ്വന്തമാക്കി യുഎഇ. വേൾഡ് പോപ്പുലേഷൻ റിവ്യൂ പുറത്തുവിട്ട 2026-ലെ ഏറ്റവും പുതിയ അന്താരാഷ്ട്ര റാങ്കിംഗിലാണ് യുഎഇ ഈ മികച്ച നേട്ടം കൈവരിച്ചത്. റോഡുകളുടെ നിർമ്മാണ മികവ്, കൃത്യമായ അറ്റകുറ്റപ്പണികൾ, സുരക്ഷാ മാനദണ്ഡങ്ങൾ, സ്മാർട്ട് ട്രാഫിക് മാനേജ്മെന്റ് സംവിധാനങ്ങൾ, നഗരങ്ങൾ തമ്മിലുള്ള മികച്ച കണക്റ്റിവിറ്റി എന്നിവ വിലയിരുത്തിയാണ് ഈ പട്ടിക തയ്യാറാക്കിയത്.
പതിറ്റാണ്ടുകളായി രാജ്യം നടപ്പിലാക്കിയ ദീർഘവീക്ഷണത്തോടെയുള്ള നിക്ഷേപങ്ങളാണ് ദുബായ്, അബുദാബി ഉൾപ്പെടെയുള്ള പ്രധാന നഗരങ്ങളെ ബന്ധിപ്പിക്കുന്ന അത്യാധുനിക ഹൈവേ ശൃംഖലയ്ക്ക് പിന്നിൽ. അത്യാധുനിക ലൈറ്റിംഗ് സംവിധാനങ്ങളും മൾട്ടി-ലെയ്ൻ പാതകളും വഴി സുരക്ഷിതമായ യാത്രാ സൗകര്യമാണ് യുഎഇ ഒരുക്കുന്നത്. ആഗോള പട്ടികയിൽ സിംഗപ്പൂർ ഒന്നാം സ്ഥാനവും സ്വിറ്റ്സർലൻഡ് രണ്ടാം സ്ഥാനവും നേടിയപ്പോൾ നെതർലൻഡ്സ്, ജപ്പാൻ, ജർമ്മനി, അമേരിക്ക തുടങ്ങിയ പ്രമുഖ രാജ്യങ്ങളെ പിന്നിലാക്കിയാണ് യുഎഇ മൂന്നാമതെത്തിയത്.
അബുദാബി : അൽ ദഫ്ര റീജിയണിലെ മദീനത്ത് സായിദിലുള്ള ശൈഖ സലാമ ബിൻത് ബുത്തി റോഡിൽ (E45) ഭാഗിക റോഡ് അടച്ചിടൽ ഏർപ്പെടുത്തിയതായി അബുദാബി മൊബിലിറ്റി അറിയിച്ചു. റോഡ് നവീകരണ പ്രവൃത്തികളുടെയും അടിസ്ഥാന സൗകര്യ വികസന പരിപാലനങ്ങളുടെയും ഭാഗമായാണ് ഈ താൽക്കാലിക നിയന്ത്രണം.
അധികൃതർ വ്യക്തമാക്കിയതനുസരിച്ച്, ലിവ (Liwa) ഭാഗത്തേക്കുള്ള റോഡിന്റെ വലതുവശത്തെ വരിയാണ് (Right-hand lane) അടച്ചിടുന്നത്. ജൂൺ 1 തിങ്കളാഴ്ച രാത്രി 11 മണി മുതൽ ആരംഭിച്ച് ജൂൺ 15 തിങ്കളാഴ്ച പുലർച്ചെ 5 മണി വരെ രണ്ടാഴ്ചക്കാലത്തേക്കാണ് ഈ നിയന്ത്രണം ഏർപ്പെടുത്തിയിരിക്കുന്നത്. നിർമ്മാണ പ്രവർത്തനങ്ങൾ നടക്കുന്ന സമയത്തും ബാക്കിയുള്ള വരികളിലൂടെ തടസ്സമില്ലാതെ ഗതാഗതം തുടരുന്നതായിരിക്കും.
ഈ വഴിയിലൂടെ കടന്നുപോകുന്ന വാഹനമോടിക്കുന്നവർ അതീവ ജാഗ്രത പാലിക്കണമെന്നും, വേഗത പരിധി കൃത്യമായി പാലിച്ചുകൊണ്ട് താൽക്കാലിക ട്രാഫിക് സിഗ്നലുകളും നിർദ്ദേശങ്ങളും കർശനമായി പിന്തുടരണമെന്നും അതോറിറ്റി അഭ്യർത്ഥിച്ചു. നിർമ്മാണ തൊഴിലാളികളുടെയും റോഡ് ഉപയോക്താക്കളുടെയും സുരക്ഷ ഉറപ്പാക്കുന്നതിനായി താൽക്കാലിക ട്രാഫിക് മാനേജ്മെന്റ് സംവിധാനങ്ങളും മാപ്പും അതോറിറ്റി പുറത്തുവിട്ടിട്ടുണ്ട്.
