ഷാർജ : എമിറേറ്റിലെ പൊതു പാർക്കിംഗ് സേവനങ്ങളുടെ സമയം നീട്ടി നിശ്ചയിച്ച് ഷാർജ മുനിസിപ്പാലിറ്റി. ജൂലൈ 1 മുതൽ ഷാർജ സിറ്റി, കൽബ, ഖോർഫക്കാൻ, അൽ ദൈദ് എന്നീ നഗരങ്ങളിലെ എല്ലാ പെയ്ഡ് പാർക്കിംഗ് മേഖലകളിലും അർദ്ധരാത്രി 12 മണി വരെ ഫീസ് ബാധകമായിരിക്കും. മഞ്ഞ ബോർഡുകളുള്ള (Yellow Signs) പാർക്കിംഗ് സോണുകളുടെ സമയവും ബ്ലൂ ബോർഡുകളുള്ള (Blue Signs) സോണുകൾക്ക് സമാനമായി ഏകീകരിച്ചുകൊണ്ടാണ് പുതിയ ഉത്തരവ്.
മുമ്പ് മഞ്ഞ ബോർഡുകളുള്ള സോണുകളിൽ രാത്രി 10 മണി വരെയായിരുന്നു പെയ്ഡ് പാർക്കിംഗ് എങ്കിൽ ഇനി മുതൽ അത് രണ്ട് മണിക്കൂർ കൂടി നീട്ടി അർദ്ധരാത്രി വരെയാക്കി. നിലവിലുള്ള സംവിധാനം അനുസരിച്ച് വെള്ളിയാഴ്ചകളിലും ഔദ്യോഗിക പൊതു അവധി ദിവസങ്ങളിലും പാർക്കിംഗ് സൗജന്യമായിരിക്കും (ആഴ്ചയിൽ 7 ദിവസവും പണം ഈടാക്കുന്ന പ്രത്യേക സോണുകൾ ഒഴികെ). നഗരങ്ങളിലെ വർദ്ധിച്ചുവരുന്ന ജനസംഖ്യയും വാണിജ്യ-ടൂറിസം വളർച്ചയും കണക്കിലെടുത്താണ് പാർക്കിംഗ് സമയം രാവിലെ 8 മുതൽ അർദ്ധരാത്രി 12 വരെയാക്കി ഏകീകരിച്ചതെന്ന് പബ്ലിക് പാർക്കിംഗ് ഡിപ്പാർട്ട്മെന്റ് ഡയറക്ടർ ഹമീദ് അൽ ഖായിദ് വ്യക്തമാക്കി. ഈ സമയമാറ്റം കാരണം സീസണൽ സബ്സ്ക്രിപ്ഷൻ (Seasonal Subscription) നിരക്കുകളിൽ മാറ്റമുണ്ടാകില്ലെന്നും ഉപഭോക്താക്കൾക്ക് കൂടുതൽ സമയം പാർക്കിംഗ് പ്രയോജനപ്പെടുത്താമെന്നും അതോറിറ്റി അറിയിച്ചു.
