അബുദാബി: ആഗോളതലത്തിൽ ദ്രവീകൃത പ്രകൃതിവാതകത്തിന്റെ (LNG) വർദ്ധിച്ചുവരുന്ന ആവശ്യകത കണക്കിലെടുത്ത് തങ്ങളുടെ കപ്പൽ വ്യൂഹം വിപുലീകരിക്കാനൊരുങ്ങി അഡ്നോക് ലോജിസ്റ്റിക്സ് ആൻഡ് സർവീസസ് (Adnoc L&S). ഇതിന്റെ ഭാഗമായി ഏകദേശം 3300 കോടി ദിർഹം (900 മില്യൺ ഡോളർ) ചെലവിൽ അടുത്ത തലമുറയിൽപ്പെട്ട നാല് പുതിയ എൽഎൻജി കാരിയർ കപ്പലുകൾ വാങ്ങാൻ കമ്പനി ഓർഡർ നൽകി.
1,75,000 ക്യൂബിക് മീറ്റർ ശേഷിയുള്ള ഈ നാല് അത്യാധുനിക കപ്പലുകളും ഷാങ്ഹായിലെ ജിയാങ്നാൻ ഷിപ്പ്യാർഡിലാണ് നിർമ്മിക്കുന്നത്. 2029-ഓടെ ഇവ അഡ്നോകിന് കൈമാറും. 2035-ഓടെ പ്രതിവർഷം 47 മില്യൺ ടൺ എൽഎൻജി വിപണനം ചെയ്യുക എന്ന ലക്ഷ്യത്തോടെ അടുത്തിടെ ആരംഭിച്ച അഡ്നോകിന്റെ ഗ്ലോബൽ എൽഎൻജി ട്രേഡിംഗ് പ്ലാറ്റ്ഫോമിന് ഈ പുതിയ കപ്പലുകൾ വലിയ കരുത്താകും. യുഎഇ വ്യവസായ-അത്യാധുനിക സാങ്കേതികവിദ്യാ മന്ത്രിയും അഡ്നോക് ഗ്രൂപ്പ് സിഇഒയുമായ ഡോ. സുൽത്താൻ അഹമ്മദ് അൽ ജാബറിന്റെ ചൈന സന്ദർശനത്തിനിടയിലാണ് ഇതുസംബന്ധിച്ച കരാർ ഒപ്പിട്ടത്. ആഗോള ഊർജ്ജ പരിവർത്തനത്തെ പിന്തുണയ്ക്കുന്നതിനും വിപണിയിലെ ആവശ്യകത വേഗത്തിൽ നിറവേറ്റുന്നതിനുമാണ് ഈ നിക്ഷേപമെന്ന് അഡ്നോക് എൽ ആൻഡ് എസ് ചീഫ് എക്സിക്യൂട്ടീവ് ഓഫീസർ ക്യാപ്റ്റൻ അബ്ദുൽ കരീം അൽ മസാബി പറഞ്ഞു.