അബുദാബി : ഫിലിപ്പീൻസിലെ ദക്ഷിണ പ്രവിശ്യയായ ദാവോ ഒക്സിഡന്റലിലും മിന്ദനാവോ മേഖലയിലും ഉണ്ടായ ശക്തമായ ഭൂകമ്പത്തിൽ ജീവഹാനി സംഭവിക്കുകയും നിരവധി പേർക്ക് പരിക്കേൽക്കുകയും ചെയ്ത പശ്ചാത്തലത്തിൽ ഫിലിപ്പീൻസ് ജനതയ്ക്ക് ഐക്യദാർഢ്യം പ്രഖ്യാപിച്ച് യുഎഇ.
ഇതുസംബന്ധിച്ച് യുഎഇ വിദേശകാര്യ മന്ത്രാലയം (MoFA) പുറത്തിറക്കിയ പ്രസ്താവനയിൽ, ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങളെയും ഫിലിപ്പീൻസ് സർക്കാരിനെയും ജനങ്ങളെയും തങ്ങളുടെ ആത്മാർത്ഥമായ അനുശോചനവും സഹതാപവും അറിയിച്ചു. പരിക്കേറ്റവർ എത്രയും വേഗം സുഖം പ്രാപിക്കട്ടെയെന്നും മന്ത്രാലയം ആശംസിച്ചു. ഈ പ്രയാസകരമായ സമയത്ത് ഫിലിപ്പീൻസിന് ആവശ്യമായ എല്ലാ പിന്തുണയും യുഎഇ വീണ്ടും ഉറപ്പുനൽകി. ഫിലിപ്പീൻസിന്റെ തെക്കൻ തീരത്തുണ്ടായ ഈ ശക്തമായ ഭൂകമ്പത്തെത്തുടർന്ന് തകർന്നടിഞ്ഞ പ്രദേശങ്ങളിൽ നിലവിൽ അടിയന്തിര രക്ഷാപ്രവർത്തനങ്ങളും നാശനഷ്ടങ്ങളുടെ വിലയിരുത്തലുകളും പുരോഗമിക്കുകയാണ്.
