ദുബായ് : ദുബായ് പ്രസ് ക്ലബ്ബും ദുബായ് കൾച്ചർ ആൻഡ് ആർട്സ് അതോറിറ്റിയും സംയുക്തമായി സംഘടിപ്പിച്ച ‘ദുബായ് കണ്ടന്റ് ക്രിയേറ്റേഴ്സ് പ്രോഗ്രാമിന്റെ’ മൂന്നാം ഘട്ടത്തിന് വിജയകരമായ സമാപനം. ഡിജിറ്റൽ മാധ്യമങ്ങളിലൂടെ ദുബായുടെ തനത് സംസ്കാരവും പാരമ്പര്യവും മൂല്യങ്ങളും ആഗോളതലത്തിൽ എത്തിക്കാൻ ക്രിയേറ്റർമാരെ പ്രാപ്തരാക്കുക എന്ന ലക്ഷ്യത്തോടെയാണ് ഈ പ്രത്യേക പരിശീലനം സംഘടിപ്പിച്ചത്.
ജൂൺ 8 മുതൽ 19 വരെ നീണ്ടുനിന്ന തീവ്ര പരിശീലന പരിപാടിയിൽ പ്രമുഖ ഡിജിറ്റൽ പ്ലാറ്റ്ഫോമുകൾക്കായുള്ള വിഷ്വൽ സ്റ്റോറിടെല്ലിംഗ്, ആർട്ടിഫിഷ്യൽ ഇന്റലിജൻസ് (AI) ടൂളുകളുടെ ഉപയോഗം, പ്രൊഫഷണൽ ഫോട്ടോഗ്രാഫി, എഡിറ്റിംഗ് എന്നിവയിലാണ് പ്രാക്ടിക്കൽ വർക്ക്ഷോപ്പുകൾ നടന്നത്. പ്രശസ്ത എമിറാത്തി സംവിധായകൻ മുഹമ്മദ് സയീദ് ഹാരിബ് ഉൾപ്പെടെയുള്ള പ്രമുഖർ സെഷനുകൾക്ക് നേതൃത്വം നൽകി. ദുബായുടെ വികസനത്തിനൊപ്പം ഡിജിറ്റൽ മീഡിയ രംഗത്തും മികച്ച പ്രതിഭകളെ വാർത്തെടുക്കാനാണ് ഈ സംരംഭത്തിലൂടെ ലക്ഷ്യമിടുന്നതെന്ന് ദുബായ് പ്രസ് ക്ലബ് ഡയറക്ടർ മറിയം അൽ മുല്ല വ്യക്തമാക്കി. സാമ്പത്തികം, ആരോഗ്യം, ശാസ്ത്രം തുടങ്ങിയ മേഖലകൾക്ക് ശേഷമാണ് മൂന്നാമത്തെ സാംസ്കാരിക ഘട്ടം ഇപ്പോൾ വിജയകരമായി പൂർത്തിയാക്കിയിരിക്കുന്നത്.
