അബുദാബി : ദക്ഷിണ ഇറാഖിലെ നസിരിയ (Nasiriyah) നഗരത്തിന് സമീപം തീർത്ഥാടകർ സഞ്ചരിച്ച ബസ് മറിഞ്ഞുണ്ടായ വൻ അപകടത്തിൽ നിരവധി പേർ മരിക്കുകയും പരിക്കേൽക്കുകയും ചെയ്ത പശ്ചാത്തലത്തിൽ ഇറാഖ് ജനതയ്ക്ക് ഐക്യദാർഢ്യം പ്രഖ്യാപിച്ച് യുഎഇ.
യുഎഇ വിദേശകാര്യ മന്ത്രാലയം (MoFA) പുറത്തിറക്കിയ ഔദ്യോഗിക പ്രസ്താവനയിൽ, ഈ ദാരുണമായ ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങളെയും ഇറാഖ് സർക്കാരിനെയും ജനങ്ങളെയും തങ്ങളുടെ ആത്മാർത്ഥമായ അനുശോചനവും സഹതാപവും അറിയിച്ചു. അപകടത്തിൽ പരിക്കേറ്റവർ എത്രയും വേഗം സുഖം പ്രാപിക്കട്ടെയെന്നും മന്ത്രാലയം ആശംസിച്ചു. നസിരിയയെയും ബസ്രയെയും ബന്ധിപ്പിക്കുന്ന ഹൈവേയിൽ വെച്ച് ഡ്രൈവർക്ക് നിയന്ത്രണം നഷ്ടപ്പെട്ട ബസ് മറിഞ്ഞ് തീപിടിക്കുകയായിരുന്നു. അപകടത്തിൽപെട്ടവരിൽ ഭൂരിഭാഗം പേർക്കും ഗുരുതരമായി പൊള്ളലേറ്റിട്ടുണ്ട്. പ്രയാസകരമായ ഈ ഘട്ടത്തിൽ ഇറാഖിന് ആവശ്യമായ എല്ലാ പിന്തുണയും യുഎഇ ഉറപ്പുനൽകി.
