ദുബായ് : താൽക്കാലിക തടസ്സങ്ങൾക്ക് ശേഷം പൂർണ്ണ സജ്ജമായി തിരിച്ചെത്തി ദുബായിലെ ആവേശം നിറഞ്ഞ വിനോദ കേന്ദ്രമായ ‘സ്കൈഡൈവ് ദുബായ്’ (Skydive Dubai). ചുരുങ്ങിയ ദിവസങ്ങൾക്കുള്ളിൽ തന്നെ സന്ദർശകരുടെ വൻ തിരക്കാണ് ഇവിടെ അനുഭവപ്പെടുന്നത്. സ്കൈഡൈവ് ദുബായ് ഒരിക്കലും നിർത്തിവെച്ചിട്ടില്ലാത്ത രീതിയിലാണ് നിലവിലെ പ്രവർത്തനങ്ങളെന്ന് ശമാൽ ഹോൾഡിങ്സിലെ ലെഷർ & എന്റർടൈൻമെന്റ് എക്സിക്യൂട്ടീവ് വൈസ് പ്രസിഡന്റ് മുഹമ്മദ് ജവാദ് ഗൾഫ് ന്യൂസിന് നൽകിയ പ്രത്യേക അഭിമുഖത്തിൽ വ്യക്തമാക്കി.
പ്രാദേശിക അനിശ്ചിതത്വങ്ങളെ തുടർന്ന് താൽക്കാലികമായി നിർത്തിവെച്ചിരുന്ന സർവീസുകൾ കഴിഞ്ഞ ഏപ്രിൽ അവസാന വാരത്തിലാണ് ‘ബൈ വൺ ഗെറ്റ് വൺ’ (Buy-one, get-one) എന്ന ആകർഷകമായ ഓഫറോടെ പുനരാരംഭിച്ചത്. പ്രഖ്യാപനം വന്നയുടൻ തന്നെ രണ്ടായിരത്തിലധികം ആളുകളാണ് സോഷ്യൽ മീഡിയ വഴി ബുക്കിംഗിനായി ബന്ധപ്പെട്ടത്. ജനങ്ങളുടെ ഭാഗത്തുനിന്നുണ്ടായ ഈ വൻ ഡിമാൻഡ് കാരണം നിലവിൽ ഈ ഓഫർ ഒരു ആഴ്ചത്തേക്ക് കൂടി നീട്ടിയിട്ടുണ്ട്.
ആദ്യം വെള്ളി, ശനി, ഞായർ എന്നീ മൂന്ന് ദിവസങ്ങളിൽ മാത്രമായി ആരംഭിച്ച സർവീസ്, തിരക്ക് വർദ്ധിച്ചതിനെ തുടർന്ന് തിങ്കൾ മുതൽ വ്യാഴം വരെയുള്ള ദിവസങ്ങളിലേക്ക് കൂടി വ്യാപിപ്പിച്ചു. പ്രതീക്ഷിച്ചതിലും 120 ശതമാനത്തോളം അധികം ആളുകളാണ് ഇപ്പോൾ സ്കൈഡൈവിംഗിനായി എത്തുന്നത്. സർവീസുകൾ നിർത്തിവെച്ചിരുന്ന സമയത്തും വിമാനങ്ങളുടെയും മറ്റ് അത്യാധുനിക ഉപകരണങ്ങളുടെയും സുരക്ഷാ പരിശോധനകൾ മുടങ്ങാതെ നടത്തിയിരുന്നതായി അധികൃതർ അറിയിച്ചു. സുരക്ഷയ്ക്കാണ് തങ്ങൾ ഏറ്റവും കൂടുതൽ മുൻഗണന നൽകുന്നതെന്നും സന്ദർശകർക്ക് ജീവിതത്തിലൊരിക്കലും മറക്കാനാകാത്ത ഓർമ്മകൾ സമ്മാനിക്കുകയാണ് ലക്ഷ്യമെന്നും മുഹമ്മദ് ജവാദ് കൂട്ടിച്ചേർത്തു.