അബുദാബി : വിദ്യാർത്ഥികളിൽ ദേശീയ മൂല്യങ്ങൾ വളർത്തുന്നതിനൊപ്പം ആർട്ടിഫിഷ്യൽ ഇന്റലിജൻസ് (AI) ഉൾപ്പെടെയുള്ള അത്യാധുനിക സാങ്കേതികവിദ്യകളിൽ അധിഷ്ഠിതമായ പുത്തൻ വിദ്യാഭ്യാസ നയത്തിന് രൂപം നൽകി അബുദാബി സർക്കാർ. അബുദാബി ഡിപ്പാർട്ട്മെന്റ് ഓഫ് എഡ്യൂക്കേഷൻ ആൻഡ് നോളജ് (ADEK) ആണ് സ്വകാര്യ വിദ്യാഭ്യാസ മേഖലയ്ക്കായുള്ള ഈ പുതിയ തന്ത്രങ്ങൾ പ്രഖ്യാപിച്ചത്.
നാല് പ്രധാന ലക്ഷ്യങ്ങളാണ് ഈ പുതിയ തന്ത്രത്തിന് പിന്നിലുള്ളത്. ദേശീയ വ്യക്തിത്വവും എമിറാത്തി മൂല്യങ്ങളും ശക്തിപ്പെടുത്തുക, വിദ്യാർത്ഥികളുടെ ആരോഗ്യം, സുരക്ഷ, മാനസിക ക്ഷേമം എന്നിവ ഉറപ്പാക്കുക, ഭാവിയിലേക്ക് ആവശ്യമായ നൂതന കഴിവുകൾ വികസിപ്പിക്കുക, അധ്യാപകരുടെ മികവിലൂടെ മികച്ച വിദ്യാഭ്യാസ അന്തരീക്ഷം സൃഷ്ടിക്കുക എന്നിവയാണവ.
220-ലധികം സ്വകാര്യ സ്കൂൾ പ്രിൻസിപ്പൽമാർ പങ്കെടുത്ത ഫോറത്തിലാണ് എഡ്യൂക്കേഷൻ ഡിപ്പാർട്ട്മെന്റ് ചെയർമാൻ മുഹമ്മദ് അൽ ഖാദി പുതിയ നയം അവതരിപ്പിച്ചത്. യുഎഇയിലെ നാനൂറിലധികം സർക്കാർ-സ്വകാര്യ സ്ഥാപനങ്ങളുമായി സഹകരിച്ച് തയ്യാറാക്കിയ ഈ പരിഷ്കരണത്തിൽ സ്വകാര്യ സ്കൂളുകൾക്കായി 39 പുതിയ നയങ്ങളും പ്രീ-സ്കൂളുകൾക്കായി 27 പുതിയ നയങ്ങളും ഉൾപ്പെടുത്തിയിട്ടുണ്ട്. വിദ്യാർത്ഥികൾക്ക് സ്കൂളുകളിൽ എഐ സാങ്കേതികവിദ്യകൾ ഉത്തരവാദിത്തത്തോടെ ഉപയോഗിക്കാനുള്ള പരിശീലനവും ഇതിലൂടെ നൽകും.
