ദുബായ് : ദുബായ് ഡ്യൂട്ടി ഫ്രീ മില്ലേനിയം മില്യണയർ നറുക്കെടുപ്പിൽ രണ്ട് പ്രവാസി മലയാളികൾക്ക് വൻ ഭാഗ്യം. അബുദാബിയിൽ ഏവിയേഷൻ ഓപ്പറേറ്ററായ കബീർ പൂവത്തിങ്കൽ (48), ഷാർജ എയർപോർട്ട് ഫ്രീ സോണിൽ ജോലി ചെയ്യുന്ന മുഹമ്മദ് ഷിബിൽ തയ്യിൽ (30) എന്നിവരാണ് ഒരു മില്യൺ ഡോളർ (ഏകദേശം എട്ടേകാൽ കോടി രൂപ) വീതം സ്വന്തമാക്കിയത്.
കഴിഞ്ഞ 22 വർഷമായി യുഎഇയിലുള്ള അഞ്ച് കുട്ടികളുടെ പിതാവായ കബീർ, 12 വർഷമായി ഡ്യൂട്ടി ഫ്രീ ടിക്കറ്റുകൾ എടുക്കാറുണ്ട്. എന്നാൽ കഴിഞ്ഞ ഒക്ടോബറിൽ മാത്രം ദുബായിലെത്തിയ ഷിബിൽ തൻ്റെ രണ്ടാമത്തെ ടിക്കറ്റിലൂടെയാണ് ഈ വൻ തുക സ്വന്തമാക്കിയത്. കഴിഞ്ഞ മാസമായിരുന്നു ഷിബിലിന്റെ വിവാഹം. ഡ്യൂട്ടി ഫ്രീ നറുക്കെടുപ്പിൽ ഒരു മില്യൺ ഡോളർ നേടുന്ന 278, 279-ാമത്തെ ഇന്ത്യക്കാരാണ് കബീറും ഷിബിലും.
ഇവർക്ക് പുറമെ ഫൈനസ്റ്റ് സർപ്രൈസ് നറുക്കെടുപ്പിൽ ഒമാനിലുള്ള ഇന്ത്യക്കാരനായ കൗശൽ വേദിന് മെഴ്‌സിഡസ് ബെൻസ് കാറും (Mercedes-Benz S500), കുവൈറ്റിലുള്ള കനേഡിയൻ പൗരൻ മഹ്മൂദ് ഹരീസിക്ക് അപ്രീലിയ ബൈക്കും (Aprilia RSV4 1100) സമ്മാനമായി ലഭിച്ചു.