ദുബായ് അപകടത്തിൽ മരിച്ചവരുടെ കുടുംബങ്ങൾക്ക് താങ്ങായി ഡോ. ഷംഷീർ വയലിൽ

ദുബായ് : ദുബായ് എമിറേറ്റ്സ് റോഡിലുണ്ടായ വാഹനാപകടത്തിൽ മരിച്ച ഏഴ് പ്രവാസി തൊഴിലാളികളുടെ കുടുംബങ്ങൾക്ക് 10 ലക്ഷം ദിർഹത്തിന്റെ (ഏകദേശം 2.25 കോടിയിലധികം രൂപ) സാമ്പത്തിക സഹായവുമായി ഡോ. ഷംഷീർ വയലിൽ. അപകടത്തിൽ ജീവൻ നഷ്ടപ്പെട്ട ആറ് ഇന്ത്യക്കാരുടെയും ഒരു ശ്രീലങ്കൻ സ്വദേശിയുടെയും കുടുംബങ്ങൾക്ക് 1,00,000 ദിർഹം വീതമാണ് അദ്ദേഹം പ്രഖ്യാപിച്ച മാനുഷിക പുനരധിവാസ പദ്ധതിയിലൂടെ കൈമാറുന്നത്.
കുടുംബത്തിന്റെ ഏക ആശ്രയം നഷ്ടപ്പെട്ട ദുരന്തബാധിതർക്ക് ഈ ധനസഹായം വലിയ ആശ്വാസമാകും. പണത്തിന് പുറമെ കുട്ടികളുടെ തുടർവിദ്യാഭ്യാസത്തിനായുള്ള പദ്ധതികളും അദ്ദേഹം ഒരുക്കിയിട്ടുണ്ട്. ഇതിന്റെ ഭാഗമായി, അപകടത്തിൽ മരിച്ച ഉത്തർപ്രദേശുകാരനായ തൊഴിലാളിയുടെ മകൾക്ക് നഴ്സിങ് പഠനത്തിനുള്ള പൂർണ്ണ പിന്തുണയും പഠനശേഷം യുഎഇയിലെ ബുർജീൽ ആശുപത്രികളിൽ ജോലിയും ഡോ. ഷംഷീർ ഉറപ്പുനൽകി.